البارحه ناديت من راس مشراف = واطرت على بالي كثير الطواري
البعض ذكراها حزينه و تنعاف = والبعض توصل للنجوم السواري
الله يامرت بي احداث واهداف = تخلف على الرجال بعض المحاري
اخفيتها فالقلب من خوف تنشاف = لو ان منها وسط قلبي مواري
وعاملتها باحساس راقي وشفاف = من خوف لا يشمت بها كل زاري
اواه يا قلبا معنا وميلاف = تعدي هواجيسه سوات الضواري
واحس به دايم رزيم ورجاف = محد عنه غيري من الناس داري
يالله يا معبود يا خير رواف = تكتب لي الجنه مقري وداري
انت الوحيد اللي على الكون طواف = قادر تحقق رغبتي واختياري
راشد الجمعان ( المحيط )