[هتان جده]

1- وقت الحراج الرسمي في بنقلة جدة بعد صلاة الفجر مباشرة (جربوه مره بعد العصر بس مانجح).
2- الاسماك الموجودة في الحراج مستوردة ومحلية (المحلية تشمل سمك شمال جدة مثل أملج و ثول مثلا وجنوب جدة وهي دائما تكون حوت شك ( أقلام أو بيعات) يعني حوتها ينباع بالربطة مثلا الناجل الكبير شك واحد يعنى ينباع لوحده و اللوطي (الشريفي الوسط ممكن شك 2 و 3 و الصغار شك 4 او 5 أو أكثر) ويكون بينها كل حوت الساحل على حسب الموسم حتى ضواريك (كنعد) اذا كان وقتها.
3- في دكات أو صبات في الجزء الشمالي الغربي وهي أماكن الحراج وتعمل فقط في الصباح. أما جنوب البنقلة فلا يوجد حراج وإنما أكشاك ومحلات عادية.
4- الاسماك المستوردة تنباع بالكيلو او الصندوق وانواعها واشكالها نوعا ما مميزة ومصادرها غالبا عمان واليمن على ما اعتقد.
5- كل دكة أو صبه متخصصه في نوع (مستورد أو محلي ) معين مثلا الجديبي عنده دكه تبيع محلي فقط وعنده دكه في الجهه الثانية تبيع مستورد ونفس الشي للجحدلي و غيرهم.
6- بعض العمال والاشخاص يشتروا السمك من الحراج ويبيعوه في بسطات في وقتها في نفس المكان...ما انصح انك تشتري منهم لانهم ممكن يخلطوه بسمك امس او اقدم. وهما العمال موجودين طوال اليوم تقريبا الى صلاة العشاء.
7- المحلات و الاكشاك (جنوب البنقلة) متخصصة في انواع معينه واغلب سمكها مستورد وبعضها محلي لاكن غالي وغالبا مشترى من الحراج ويكون له اكثر من يوم. (سمكهم مايعجبني)
8- بالنسبة لمشترى الظهر( فعلا هو أنظف و أجد وأحسن سمك في البنقلة) لاكن السعر خيالي جدا واذا جيت بعد الصلاة مباشرة حتلاقي السمك طازج ويجي مع الحواتين وهوا تقريبا حي لاكن السعر مبالغ فيه جدا...بس في ناس تشتري.
9- السمك الي في الاحياء مشترى من البنقلة غالبا لاكن في عامل تأخير يوم ولا يومين (مع عامل تخزين كم يوم وارد)...يعنى مو جديد .....وهامورهم غالبا من الخليج (عماني) و حريدهم والناجل من البحر الاحمر.
10- شركة الاسماك (نعم ماغيرها) أحيانا ممكن يكون المعروض عندها بنظافة الموجود في البنقلة والسعر ارخص وغالبا الفرع يكون قريب من أي بيت.
11- فكرة أخيرة...في ناس كثير من جدة تروح تشتري من ثول....وسمك ثول انظف بكثير والذ...(ورابغ الذ اكثر) بس طبعا اللذه مسألة شخصية..المهم...في ثول تقدر تروح الحراج وهوا بعد صلاة العصر...وفي المحلات (منتشرة قريب الخط القديم والمسجد) وسمكها نظيف ويكون له يوم جاي من الحراج..وسعره غالي بس ارخص من جده
12- الخيار الاخير هو انك تشتري سمك من المرسى في ثول مباشرة من الحواتين انفسهم ووقتهم من 12 الى 2 ونص وسمكهم أنظف سمك ممكن تشتريه في منطقة جدة كلها..السعر مو مره رخيص...لاكن شي مضمون....مشكلتهم انه احيانا يرفضوا يبيعوا ...او مايجيبوا الا انواع محدوده...لاكن الى يستمتع بشراء السمك لازم يجرب يشتريه من هناك. التجربة خاصة لانك لازم توقف تقريبا في الموية!! وكل مايجي بوت تتابعه الى مايوقف وتشوف عنده سمك يبغى يبيعه ولا لا......