أخوي العود الأزرق لو نجلس ننقل مقالات بس نسخ لصق ونعطل عقولنا وحتى لو كانت مقالات صادقة وتبحث عن الحقيقة لأصابتك الهستيريا مما سننقل لك من مقالات الدويش والناصر وابو هداية وفواز الشريف وسالم الشهري والملحم وبن جارالله المالكي وثامر الشمري والشيخي 1 و 2 وابو بكر مالي ومؤمنة وهود وخالد مساعد وجستنيه وأحمد صادق دياب وبامصفر و .. و .. و ..
ترى العالم تفتحت وما عاد تنطلي عليهم ألاعيب وحبكات الملاحق إياها
والأمين العام ألجم شلة المراسلين اللي يتقصدونه وجندل بهم أمس في البرنامج ووضع نقاط كثيرة عالحروف
فهون عليك وتركد تركد وأنا أخوك
وتراني بديت أحس إنك إلى الهداية والحق أقرب
يعني باقي لك كم تكة وتلحق محاضر عندنا بالجامعه ( الآن يحضر دكتوراه ) قلب من هلالي متعصب إلى نصراوي ومحب لكل فريق وطني شريف
وجلس طلاب كثير هلاليين في محاضره خلاها عن النقاش عن التعصب والتشجيع يحاورونه ليش غير من الهلال وللنصر تحديداً
وقال أول عطوني أسباب تشجيعكم لأنديكتم وإختياركم لها ووش رايكم بالمسابقات الرياضية وما قصر كل واحد قال وجهة نظره ( بالإنجلش طبعاً )
وفي الأخير
قال وبالفم المليان للهلاليين :
جوابي على سؤالكم إني وعلى مدى 30 سنة كل يوم أجد صعوبة أكثر في الإجابة على أسئلة محيرة توجه لي من ناس غير هلاليين مهتمين بالرياضة وأسئلة تطرحها على نفسي من وقت للثاني وبأسباب ما أراه وأشاهده بأم عيني ولا يرضاه ضميري
واضاف : وللأسف لم أجد إجابه مقنعه سوى أنّ ناديّ السابق الهلال لا يستحق التشجيع ، وإن فرضنا وشجعته فلا يستحق الدفاع عنه بل لا وجه لي ولا لأي هلالي للدفاع عنه والسبب ماضيه وحاضره ( العجيب والمحير )
طبعاً بعدها أُلجم زملائنا الهلاليين وانعقدت ألسنتهم ومنهم ابن لرمز من رموز التعصب الأزرق بجريدة الجزيرة ( بس للأمانة الولد طيب وحبيب وصديق مقرب بس عيبه إنه يكثر نيله على ثيابه )
عاد ولو تشوفنا النصراويين والإتحاديين ( اتحادي واحد فقط بالقاعه وغامدي ) انفرجت أساريرنا وروسنا ما عاد يقطعها ألف سيف خاصة والمحاضر معروف برجاحة عقله وذكاءه
يمكن تكذبني بس لك وعد وراسلني عالخاص أعطيك إسمه بكلية اللغات / جامعة الملك سعود ورح أسأله بنفسك وتأكد
تقبل تحياتي أخوك النصراوي المسكين البريء
أحمد العدواني