[poem=font="Simplified Arabic,5,indigo,bold,normal" bkcolor="transparent" bkimage="" border="none,4," type=2 line=0 align=center use=ex num="0,black"]
بين الـورق والقلـم والشـعر واسـراره=سحر البيان اعرف اصوغه واباهي به
اوزن كـلامي على نهجه ومحضـاره=واللي كـلامه ذهـب لاشـك يزهي به
يا "راعـي الاوله" تستـاهل الشـاره=يقولها اللــي تعـلا فـي مناصـيبه
من عانق الغيم يستمطر من امطاره=وان لاح بـرق السما يعرف مراقيبه
وانا على قلعة المـرقاب واسـواره=حققت حلم ٍ يماري بي.. واماري به
فصل الربيع اعرفه من ريحة ازهاره=والصـيف لاحـل وقته حــان توجيبه
ياللي على شب نار الشوق صداره=ياما تنفست جمـري من ملاهـيبه
ماكل من عـاف بشته قل مقــداره=ولا كل من يلبس الابيض نهلي به
ولا كل رجل ٍ تعلى خاف محداره=دام المعـالي تحـقق له مطالـيبه
"الصقر" ما يعرفه ياكود صقاره="حوران" ما ياكل الا من مخاليبه
الشوق اعرفه واعرف العشق وآثاره=ياما تقهـوى شبـابي من مشـاريبه
يا نجمة الليل... ياقمرا... وسماره=درب الخطا للفتى لا شك يسري به
ياذيب ياللي عرفت الليل واخباره=اوصف لهم كم تسامرنا على طيبه
علمهم ان الشمـوخ اموت واختاره=واللي يبيني يجيني قبل لا جيبه
الله ياكـم غـرق فالبحــر بحــاره=ماكل من يركب السنبوك يرسي به
العقــل يثري فطين الذهن بافكاره=والراس لامن خوى وش عاد نرجي به
و"العين" لافتحت بـ "النون" بصاره=وان غمضت حكمت الله ما بها ريبه
قالوا لسانك حصانك حزة الغاره=ومن لا يصونه يعيش بهم تكذيبه
احفظ لساني عن الممنوع واخطاره=واعسف كلام الردى والذل والخيبه
والنفــس لوكانها خضـرا وأمـاره=اسج عن شورها واللي تنادي به
وان حاربتني جيوش ابليس وانصاره=دعـيت ربي يسخـر لـي منـاديبه
يالله ياحافظ المبعوث في غاره=احفظ لساني عن الزلات والغيبه
وان كان زلــيت انا طــالبك كفاره=طيش الشباب انتهى في حضرة الشيبه
مرت "ثلاثين عام" النفـس محتـاره=ما بين حلم الشباب وبعض الاعيبه
عاشرت ناس ٍ تحب المظهر الفاره=والخافي الله يعلم به ويدري به
وعايشت ناس ٍ عشاها المر وامراره=متعلي ٍ شانها.... واخلاقها هيبه
ماشيت الاعمــى وقديتـه لمسياره=واللي عمى القلب لا اجيبه ولا اغدي به
والشيـخ له منزله عنـدي وله داره=احفظ علومـه وتعليمـه وتهذيبـه
والجار له كل ما يلزم على جاره=حشمه وتقدير وابديه وابدي به
والصاحب اللي على قيض الزمن ناره=برد وسلام...البخور يفوح من جيبه
ولا الدني مذهبه ماخوذ من كاره=يانافخ الكير يالمفتون في عيبه
انا اشهد ان السنين المقفيه تاره=اذكر حلاها وتاره جمر واصلي به
ياذيب ياللي فهمت القصد والشاره=بلغهم ان المسـا شـارف بتغــريبه
وان الورق والقلم والشعر واسراره=شاهد عيان اعتزالي يوم اباهي به
وان كان من عاف بشته قل مقداره=---وكاد غيري تلزم في شراريبه---[/poem]
مرحبا بك وبعودتك ..
التي لا يشبهها سوى عودة المطر بعد الجفاف مبدع متقد الذهن والشعر من اجمل القصائد واعذبها
حقيقه وليست مجامله قصيده محمله بالصوره والجمال والحكمه والمبادي ..
ويهمنا كثيرا تواجدك المستمر وعدم انقطاعك وارجو لك التوفيق في حياتك ....
تحياتي وتقديري واحترامي
ـــــــــــــــــــــــــــــــــــــ
|