[راجي الوصل]

[align=center]
لك الله يا قلبٍ بعد ما حلفت ايمان
على انك تتوب وتترك الحب لاصحابه
.
ولا عاد تتولع ولا ياخذك تحنان
بعد ما اجرحتك اللي مع الناس لعّـابة
.
اشوفك رجعت وفيك شوق المولع بان
وولعّـت معْـك الروح والروح منصابة
.
الا يا جميل الوجه يا صافي الاوجان
غرامك علينا يا ابيض اللون وش جابه
.
انا والله اني كنت ساليْ ولا لي شان
بدرب الهوى واللي شكا صدة احبابه
.
وقسّـيت قلبي لاجل ما اوقع واعض لسان
وخليت درب العشق واقفلت انا بابه
.
وجيت اقتحمت الباب والسور والميدان
ولا معْـك رشاش ولا معْـك دبابة
.
سلاحك عيون ٍ جل من صور الاعيان
وربي ما يفتك مثلها سيّـد الغابة
.
انا يوم اطالعها يجيني هَـبَـل وجنان
واتمتم بقول للعرب ما احسب حسابه
.
واحس ان دمّي واقفٍ داخل الشريان
وروحي على درب التهاليك منسابة ![/align]