[أبو عبد العزيز]

[align=center]سبحان من يرزق بتوع الملاييـن
الرازق اللي ما يخيب الرجـا بـه
لي عم عنده معـرضٍ للصوالين
أموت واعرف بس من وين جابـه
وإذا سألته قـال بعت الدكاكين
مايدري اني ماهضمت الإجابه
الشاهد إني رحت له قبل يومين
في قصره العامـر ودقيـت بابـه
قال أرحب أرحب عدّ ورد البساتين
يا مرحبا باللـي لفـا يـا هلابــه
قلت البقا عـدّ النفـل والرياحيـن
يا شيخ شمل أهل الكرم والذرابـه
قال اسلم الله يحفظك لي من العين
وامر أوامر حضرتك مستجابه
يامرحبا وأهلين والله وسهلين
والكون ترخص لاجل عينك رقابه
لكن ترى عندي شـروط وقوانيـن
قلت اشرط اشرط يا حبيب الغلابـه
قال أولاً مهر العروسـة ثمانيـن
غير الرسوم وغير حق االعصابه
والثانية عمك يبي منـك سبعيـن
رسم الأبوه والنسب والقرابه
وأم العروسة حقها منـك ستيـن
عشانها ست الحسن والمهابة
واخوانها كلن يبي منـك خمسيـن
عداً ونقداً تندرج في حسابه
وخواتها الخمس أعطهن من ثلاثين
عشان تتوثق عروق النسابه
وتجيب طقم عيار واحد وعشريـن
وخاتم من الماس المصفى ترابـه
وأكياس متروسة كعوب وفساتيـن
ألوانهـا وأشكالها مـا تشابـه
وموتر بسواقـه وفيـلا بدوريـن
أثاثهـا مـن بطرتـه ينحكـابـه
واحجز لنا قاعة بقصر السلاطيـن
واحجز بها رقاصتين وربابه
هذي الشروط اللي على بالي الحين
وذكرني اللي ما حسبنا حسابه
قلت اذكر الله يا عـدو المساكيـن
واستغفـره لا يبتلـيـك بعـذابـه
الظاهر إنك منت عارف أنا ميـن
أنا لو أرقى فـوق متـن السحابة
ما جبت حتى نص درزن مواعيـن
واضحك بكيفك واعتبرهـا دعابة
شروطكم هذي شـروط المجانيـن
شروطكم شغـل ابتـزاز ونهابـه
شروطكم تقصم ظهـور البعاريـن
شروطكـم همّـن وغـم وكآبـه
شروطكم والله سيوف وسكاكيـن
تذبح بنات المجتمع مـع شبابـه
وين الرضا والعطف واليسر واللين
اللي ذكرهـا الله بمحكـم كتابـه
وين الصفات اللي أمرنا بها الديـن
وين اختفى نهج النبي والصحابة
يا عم جعل اللي خلقنا من الطيـن
يرد عقلك مـن خطـاه لصوابـه
ويجعل نصيبي عند غيرك قل آمين
ويحسن عزا الصابر ويجزل ثوابه
قال أنت لو فكرت تفكير صاحيـن
ما شفت في مجمل شروطي غرابه
حنا بعصـر العولمـة والمزا يين
ماهوب عصر الفلسفة والخطابة
الناس تسعى للرتـب والنياشيـن
وأنت اهتمامك بالشعـر والكتابة
والشعر ما ينفعك لو هو دواويـن
ما دام جيبك مثـل بيـت الخرابـه
يا بوك لا تسمع كلام المصاخيـن
واسأل مجرب عاش في وسط غابة
قلت الله اكبر يا محـرر فلسطيـن
من يسمعك يحسبك ذيـب الذيابـه
تراك شايب راس مالـك رياليـن
والبنت ما تسوى جنـاح الذبابة..
قال انقلع مالت على وجهك الشين
لا عاد أشوفك عندنـا يالزلابـه
قلت ابشر ابشر لكن الباب من وين
واقفيت من عنده على صوت بابه[/align]