[ملف ضآيع]

[align=center]صبآح الخيــر \ مسآء الخيـر

حيآ اللـه كـل واحـد بأسمـه .. واللي ماعنده اسم الله يحييه باسم أخوه

يا جماعة الخير يالمسلمين يا النشامى .. تلفزيوننا العزيز من تالي مهوب صاحي أبد ..
قسم بالله فيه بلاوي

في السآبـــق ..

كانت الاعلانات التجارية يجيبون حريم متسترات محتشمات شوي قسم بالله ويلبسن دسوس .. ويقعدن يسولفن ويتميصلن ثم تقول وحده لخويتها : ماجربتي المنتج الفلاني ؟ تقول خويتها : لا واللهي ماجربتهوش .. تقوم خويتها تعطيها المنتج اللي يتكلم عنه الاعلان ثم بعدين تجي تشكرها وتقول فعلاً منتج مهوب صاحي فادني كثير وينتهي الاعلان ويا دار مادخلك شر ..:


الحين لا .. الحين الوضع اختلف .. إياد مدني اكبر من هالاعلانات

إذا ما طقت الحرمه الجنز .. وفلت الشعر .. وقامت تتدلع وتمشي باالكريم أو الشامبو وتهز عمرها .. مايعتبر هذا إعلان عند أبو مدني

\
\
\

أنا أذكر أن تلفزيوننا في السابق ينقلون مباراة كأس العالم .. يقوم المخرج ياخذ فرة على الجمهور الحاضر للمباراة أو يتابع الأمواج اللي يسويها الجمهور.. ومن أول ظهور لمرأة متبرجه تنحاس الشاشه فوق حدر و النقل يتوقف ويحطون صورة ثابته على برج التلفزيون على بالهم منظر .. ثم تسمع محمد خيري يقول بصوت مقتضب : عذراُ للخلل الفني وسنعود لمواصلة البث بعد قليل <<< شكلهم راحوا يطقون المخرج الأوروبي ههههههه

لااااااااا الحين الوضع اختلف عند إياد باشا .. :-

من كان يصدق يا جماعة الخير أننا راح نشوف في يوم من الايام نور الشريف او أحمد زكي في أحد أفلامهم السينمائية على شاشة قناتنا الأولى ؟


نوووور !
نور الشريف يا أبو مدني ؟
نور الشريف اللي ماخلا ولا شيء في أفلامه الا سـواهـا تقوم ترزه في قناتنا يامدني ؟ أنهبلت يا ابو الشباب


أجحدوا اللي فوق كله .. وكلموني عن مشهد قبل أسبوع .. يا هو مشهد ..
هبال يا مدني قسم بالله هبال :

\
\
\

جالس أنا والوالد في جو مفعم بالروحانية الأسرية .. في جو تملأه السكينة والوقار والحنان الأبوي .. وقاعدين نتفرج على القناة الأولى :-

"يبه أصب لك شاهي ؟ .. لا وانا ابوك توني متقهوي عند واحد .. لا يبه خلني أصب لك بياله على شاني ..بس ياولدي مالي فيه الحين والله .. ! وش اللي مالك فيه لا والله ان تشرب من يدي الجدا تراها بياله.. لعنتن تلعنك وانا أبوك وراك حقنه أقول لك ماأبي شي !"<<< طاح وجهه

المهم ..شوي إلا وجابوا فلم أمريكي .. طبعاً أنا ما تدخلت ولا غيرت القناة من باب تجديد الثقه في إياد مدني وانه ماراح يخذلني قدام الوالد بمشاهد ساخنه ..

بدأ الفلم .. البطلة ممثلة شقراء كل الزين فيها . . مرة بنطلون مرة برمودا مرة تنورة قصيرة وانا مازلت صامد ولا أفكر أغير القناة .. يخرب بيتك يا مدني على بيت اللي يثق فيك شوفوا اللي حصل :

البطلة دخلت الحمام أكرمكم الله .. أنا اللي في راسي أن المشهد راح ينقطع .. لكن للأسف أستمر المشهد والكاميرا لحقت الحرمة وسط الحمام وأبو الشباب مدني لحقهم بعد ولا قطع الصورة


موقفي الأن ضعيف لو غيرت القناة راح يشك الوالد إني ألعب عليه وان هالقناة مهيب مظبوطة وعلى باله قافطني .. خليت الأمور وانا أرجي خير واقول ماراح يطول المشهد أكثر ..

البطلة مصختها يا جماعة الخير .. قامت وترست البانيو مويه ورغوة صابون .. ومازال إبااد مدني وتلفزيونه العزيز حاضرين وحالفين الا يورونا البطلة وهي تتروش

دخل عليها في الحمام رجال .. قامت تضحك هي وياه والكاميرا ثابته على رقبة ...

جاء الرجال وعطاها سماعة التلفون وهي في البيانو .. قصدي البانيو ! لعنبو دارك يا مدني انت وأفلامك خليتني أخربط في الحتسي المهم أنتهى المشهد الحميم في قناتنا الأولى !

\
\
\

هنا الوالد ألتفت علي وقد فقد أعصابه وقال :وش هالخنبقة الله يجزر عمر الظالم مانيب قايل عمرك .. وبحركة من حركات صكني بالملعقة في خشتي ! واستطرد قائلاً : يالخسيس ياالهيس الأربد والله اني داري ان الدش اللي مركبه انت واخوانك يجيب قنوات فرنسا وتكذبون علي تقولون بس يجيب مباريات ! ..

قلت: يبه الله يجزاك خير والله انك تسمع بفرنسا وش جاب فرنسا وقنواتها والله ان هذا تلفزيون دولتك انا وش دخل أهلي في الموضوع .. قال يا التسذوب أبو متعب لو درى ان التلفزيون فيه هالمراجة ماقعده دقيقه بس أنت تسذوبن أبقع وسمرمدي طالع على خالك محمد


تدخلت كتيبة المشاة اللي هي أميمتي
وقالت وش دخل خاله محمد هااه ؟! خاله محمد عيذه بالله مصلي مسمي مايدوس العيب.. ماجذبه والله الا انت واخوانك ,, الوالد طقته أم الركب وقام يبولع ريقه .. المهم يوم شفتها قبست بين الوالد والوالده وانا اللي أحط رجلي وأطلع غرفتي وأجلس اكتب لكم هالموضوع ..

\
\
\

يا عيال منتداي( زهــران ) .. والله اني مانيب أدّعي الخير أو أقول اني ما أناظر أفلام .. لكن قسم بالله قوية ان تلفزيون المملكة العربية السعودية اللي ينقل الصلوات الخمس والتراويح والقيام يصير فيه هالتطور السخيف !


الله يذكر الفارسي بالخير .. كان رجالن أجودي ومنظبط وماله في هالأمور .. أذكر أنه قد جاب فيلم كنت قد شفته على الفيديو وكان فيلم مليء بالمشاهد الساخنه .. لكن الفارسي أذكر أنه قصقص الفلم وقطع فيه تقطيعن مهوب صاحي وأختصره من ساعه ونصف إلى 23 دقيقه بس ..


صح ان القصة أندمرت والبطلة ماشفناها أبد والمشاهد تخش في بعض وصار الفلم غير مترابط وغير مفهوم لكن يحسب للفارسي انه جاب فلم حلو وجديد ولم يخدش الذوق العام الله يذكرك بالخير ياابو فارسي.

\
\
\

ختاماً ..

آسف للإطالة وأدري أن بعض التقدميين ماراح يجوز لهم رأيي وطرحي فلا أقول لهم سوى : والله هذي الساعه المباركة انت وياه<<<

وكان معكم الناقد الفضائي طررروق وإلى اللقاء مع حكاية نقد جديدة وكشف حساب وزير آخر (( حطوا رجلينكم جاب العيد ))

بس قبل لا أطلع :-

برايفت إلى والدي العزيز

أمووت وأعرف ليش ماطقيتني الا يوم أنتهى المشهد ؟ كان بإمكانك تدبغني في منتصفه أو في بدايته لكن مدري وش سالفتك ..

تحيآتـــي \ طـــويــرق [/align]