[الســرف]

حبيبي مازرعت لك الشجر في داخلي من شان
تجي تاخذ من اعماقي ثمر وتغيب عن عيني‍!

انا لولاي احبك ماجعلت من الضلوع اغصان..
ولا علّقت عٌشّك في حشاي وقلت: .. (عِش فيني)‍


حبيبي ليه في فصل (الجليد) تقاطع البستان؟
وتتركني لوحدي والصقيع يقطّع ايديني


واذا راح الشتا والثلج هرول-واورق الرمان
تجي تقطف ثماري ثم تستنزف شراييني؟


حبيبي والشتا يجتاحني بين اربعة جدران
بها اتوقّى من البرد الشديد وما توقّيني


اسولف فيك لليل الطويل العاري البردان
وانا اشعل نار بأطراف العروق وما تدفّيني


واثرثر للجمادات الكئيبه..وازعج الحيطان
اناجيها..واناشدها الجواب ..وما تحاكيني

وافضفض للقلم-للحبر-للدفتر كما لو كان
جميع اشيائي المتناثره حولي بتوحيني!

وانا ادري مايحسّ بحرقة الإنسان ..إلا ..إنسان
ولكن كيف تاصل صرختي للي مجافيني؟

حبيبي -ماعلى صدري حرس تاقف على البيبان
انا كيف اجعل الحرّاس تاقف -بيني وبيني؟


ولو ربي خلق كلٍ بروح-وفرّق الأبدان
تظلّ انت النَفَس والنبض والدم يا ..مخليني


ومن غيرك من آلاف الوجوه التي تمرّ-احيان
انا اتشوّق لشوفه او لكلمه منه تشفيني!!


ألا يا شين فصل البرد-دامه موسم الهجران
والا ياحلو فصل الصيف دامك فيه بتجيني

حبيبي مازرعت لك الشجر في داخلي من شان
تجي تقطف من اعماقي ثمر-وتغيب عن عيني!!


عبدالله الزهراني