روائــــع خـــالـــد الفيصـــل
عـــــوى الـــــذيــــب
عوى الذيب ياسـاري ..عـوى ذيبهـا حـذرا=يـرد الظـلام عـواه ..لضلوعـه صياحـي
ترى الليل قمّـاري ..وعقـب القمـر غـدرا=ومن طاولـه مسراه..زهّـب لـه .. سلاحـي
أحد بالخفا .. داري ..وأحـد بالخفـا.. يـذرا=تشيل الدروب خطاه ..والصبـح .. فضّاحـي
طويلات .. وقصاري ..ويمنـى لهـا يسـرى=يخاف القـدم ماطاه..ماقـام .. مـن طاحـي
عن العين .. متواري ..توارى .. ورا غبـرا=يبيه النظـر وأخطـاه .. مـالاح .. لوّاحـي
على نهرنـا الجـاري ..نوايـا تبـي مجـرا=مصبّه ... شكى مبداه .. في بحر .. الأملاحي
شمال؟ ..الهوى عاري ..جنوب؟.. الرمل جمرا=مثل وسم ينثر ماه بصخـر ارض الأسياحـي
اذا ماالصقر طـاري .. عـلا بالهـوى قـدرا=وطنه السما .. وحمـاه مخـلاب .. وجناحـي
هواجيسي .. أشعاري ..ولا عَزّ القصيد وزاعلتنـي حروفـه=من يوم غاب الّلي قصيدي مهاويه
عــــــز القصيـــــد
عَزّ القصيد وزاعلتنـي حروفـه=من يوم غاب الّلي قصيدي مهاويه
غابت به الدنيا وخلّـت طيوفـه=عزّي لمن مثلي زمانـه يعاديـه
عقب الملاقىٰ بس بالقلب أشوفـه=وعقب المناجىٰ بس بالفكر أناجيه
كلامي وشوفي لغيـره حسوفـه=من غيره يْخاوي غريبي وأخاويه
يا لوعة المشتاق تصفـق كفوفـه=لين التفت ما شاف بالدّار غاليـه
كنّ العيون بكل شيـن محْذوفـه=والقلب كنّ جموع الأيام ترميـه
تسابقتني مـن زمانـي سيوفـه=جرح مْرادي في حياتي وتدميـه
يا عونة الرحمن ويـن النكوفـه=لين انتحىٰ الخفّاق وش عاد يثنيه
ما رحت أدوّر عند خلّي مروفـه=ما يرحم إلاّ الله فلا شـك مغليـه
للــــدار وحشـــــه
للدار وحشة عقب سِيد هَل الجـود=وعيني غشاها عقب شمسه ظلالـي
مالوم رجلك لو شكَت كايد الكـود=أتعبتهـا ترقـى سنـود المعالـي
للجسم حد وغايتك ما لهـا حـدود=ظلمت نفسك من قديـم(ن) وتالـي
تمشي وعرها كنه سهـود ومهـود=لله دّرك مـا تغالـيـت غـالـي
ماتنتظر للجـود ياشيـخ مـردود=تشرب مرار وتسقي الغير حالـي
ماينثني عزمك خطير على الـزود=من عالي تجمح على راس عالـي
يا طيّب طابت لك البيض والسـود=أسرت في حبك قلـوب الرجالـي
يفوح مع ذكرك شذى الورد والعود=وكل(ن) ينعم لك إلى جـا مجالـي
مرضك يمرضني وسعدك لي سعود=يا ليتي أنقل عنـك ضيـم الليالـي
اللـــه أكبـــــر
الله اكبر كيف يجرحـن العيـون=كيف ما يبرى صويب العين ابـد
أحسب أن الرمش لى سَلهم حنون=اثر رمش العين ما ياوي لأحـد
يوم روّح لي نظر عينـه بهـون=فزّ له قلبـي وصفّـق وارتعـد
لفّني مثل السحايـب والمـزون=في عيوني برق وبقلبـي رعـد
نقّض جروحي وجدّد بي طعـون=قلت يكفي قالـت عيونـه بعـد
وانعطف هاك الشعر فوق المتون=وانثنـى عـوده وقفّـى وابتعـد
أشغلتني نظـرة العيـن الفتـون=حيّرتنـي بالتـوعّـد والـوعـد
هي تمون العيـن والا ماتمـون=لى خذت قلبـي وقفّـت ياسعـد
لاوالذي صورك
لا والذي صورك ما لا ق للعيـن=غيرك ولا سوى بي أحد سواتـك
أنت الذي حطيت بالجوف رمحين=رمح العيون ورمح وَردي شفاتك
وأنت الذي زينت يا غاية الزيـن=حياتي اللي نورها مـن حياتـك
أحب فيك الحب يا جامع أثنيـن=الزين وطبوع(ن) تكمل حلاتـك
أحب فيك العطف واللطف واللين=وأحب فيك رضاك عقب زعلاتك
وأحب هاك الجيد بين الجديليـن=وأحب ما تخفيه طرقة غطاتـك
يا جارح المجروح لا تودع البين=يقضي علي بغيبتـك وسفراتـك
حـــــدنـــي وقتـــــي
حدني وقتي على شي(ن) جديـدِ=السهر ما هوب من عادة عيونـي
أَبعدوني عن هوى بالي وسِيـدي=وامنعوا عنّي خطوطه ياصلونـي
شطّروني عنه في دار(ن) بعيـدِ=حسبي الله كانهم منـه اقطعونـي
صارت الفرقا لنا علم(ن) وكيـدِ=ليتهم راحوا وأنا عنـده نسونـي
عاقني عن صاحبي سور(ن) حديدِ=دونه البحور حراس(ن) ودونـي
الرجا بك يا بو خالد يا عضيـدي=لا تخلّينـي تراهـم عذبـونـي
قلبــــي اللـــي لــــواه
قلبي اللي لواه من الصّواديـف لاوي =جرّحته الليالـي والحظـوظ الرديّـه
والله أني بوسط الناس كنّـي خَـلاوي =من يلوم المفَارِق عقب فرقا خويّـه
أشهد أن المفَارَق من عظيم البـلاوي =مير هذا نصيبك يا العيـون الشقيّـه
اتجَلّد واقول انّي علـى البعـد قـاوي =والله أعلم بقلب(ن) فيه الأشواق حيّه
كيف راحت يا بوتركي حياتي شقـاوي =وين درب السّعاده والحيـاة الهنيّـه
ليت لأهل الهوى والحب قاضي دعاوي =كان أداعي عيون اللي فراقه خطيّـه
كنّي المبلي اللـي قطّعتـه المكـاوي =كل مـا جـظّ بالونّـات زادوه كيّـه
إستكثـــرك وقتــــــــي
إستكثـرك وقتـي علَـيْ وغـدا بـك=عـادة زمانـي كلّمـا طـاب هـوّنْ
ليـت الـذي ودّاك يـا زيـن جابـك=تشوف عقبـك كيـف الايّـام سـوّنْ
شرق(ن) مشيت وغرب وقتي مشىَ بك=والقلب ما له لايـم(ن) فيـك لـوْ وَنْ
عقب الهنـا بـك ذاق لوعـة عذابـك=تـلـونّـت دنـيــاه ولا تـلــوّنْ
طويتني طـيّ الـورق فـي كتابـك=حتّـى معاليـق الحشـا لـك تطـوّنْ
إشتقـت لأيّـام الهـوَى فـي جنابـك=يوم الشّموع بليـل الاحبـاب ضـوّنْ
واشتقت أقـول لهاتفـك مرحبـا بـك=واشتقـت لغيـوم الصحـاري تكـوّنْ
عوّد ترَى داعي الهـوَى عنـد بابـك=واروي القلوب الّلي بعـد مـا تـروّنْ
غنّيت لـك عمـري ولاجـا جوابـك=واسمـي مـعَ مجنـون ليلَـى تـدوّنْ
الستيــــــــن
مرت الستيـن والشايـب طفـل=توي أدرس في كتاتيـب الحيـاه
مرت الستيـن مـازال الجهـل=كل ما جيت استره يكشف غطـاه
مرت الستين فكري مـا اشتعـل=كلمااشعل جذوتـه وقتـي طفـاه
مرت الستين دربـي مـا كمـل=واقف في راسـه أتأمـل مـداه
ألتفت والوقـت يدفعنـي عجـل-=ماانتهيت من امس وباكر ذا سناه
كل يوم أقـول فـي باكـر أمـل=وان حضر باكر رجيت اللي وراه
أرفع الهقوات لـو حظـي نـزل=واقنص القاع الذي ما احد وطـاه
المراجـل مـا بطلبتهـا خجـل=خجل اللي يقدر الطيب وعصـاه
السنين اشعـار والشاعـر مثـل=يفهمه من شاف بالعقـل وقـراه
أكتب الايام في شعـري غـزل=كل بيت عاش في عمري حيـاه
|