[ابن القحم]

اعالج لوعة المغرم وتكبر لهفة المشتاق
بحسن رضاي اسوق خطاي اقدم رجلي وافهقها
اهوجس من طلوع الشمس الى ماغيبة الاشفاق
ولاادري في ظلام الليل رجلي وش يوافقها
ابصبر واتصبر مانظن الصبر ماينطاق
ليقت الصبر مر ولو ينوش الكبد يحرقها
الاياكاملين المعرفه سلك الغرام ادقاق
الى صاب القلوب الله يعافينا يخرقها
انا لي صاحبٍ خده ورى الشيله كم البراق
بعرض المزنه اللي مثل شمس الظهر بارقها
خلقها الله وزين خلقها واخلاقها الخلاق
قليلٍ جنسها في جيلها سبحان خالقها
لها عين الى لدت بها تذبح بها العشاق
بها وصقين من عين المها وطول عاتقها
الى ماشفتها ضاقت بي الدنيا وصدري ضاق
وانا لو الهوى لي كان عيني ماتفارقها
احب مشاهد الغالي عسى ماهو بحب افراق
ولوراحت معه في مغرب الدنيا ومشرقها
الى جا الليل ماشفته يزيد بقلبي الدقاق
معه روحي فسلك العنكبوت الله معلقها
الى عرّض علي اقف مثل وقفة كسير الساق
وساعات الوداع اسرع من الكدلك دقايقها
انا وياه جددنا القسم والعهد والميثااق
ولكن قدرة الله سابقه محدٍ يسابقها
تعاطينا العهد في واحدٍ من عاهده ماباق
مادام انه تخاف النفس يلزمنا نوثقها
انا اعرف ناس ماتنقاد بالدنيا ولاتنساق
ولو تعطيك عهد الله وامانه لاتصـدقها
تشوف ازوالهم مثل العرب مال الله الرزاق
متى ماهب نسناس الهوى يظهر حقايقــها