[ابن القحم]

ماكنت أعرف الهوى والحب والنظره *** عايش بدنيا الفرح خـارج أراضيهـا
كنت اسمع الحب جمره تصطلي جمره *** دنيا ومـن عاشهـا قايـس بلاويهـا
كلن يسب الهوى والحب من حسـره *** يقول ما كل عيـن اتشـوف غاليهـا
كلن على ماحصل له يشتكـي قهـره *** وكلن على ما جرى له جـاب تاليهـا
احدن شكى من جفى غندورتن حـره *** واحدن بكى مـن مفارقهـا ويشكيهـا
واحدن طلب بس نظره ينجبر كسـره *** واحدن دعاهـا ولاهـي يـم داعيهـا
وقلبي من الحب لا سره و لا ضـره *** خالي ولا فيه بنتـن جـاب طاريهـا
عايش وادآري قلـوب العالـم المـره *** أشارك الناس فـي أصغـر بلاويهـا
أواسي أفلان ما ضرك تـرى سـره *** راحت عسـى الله يهنيـك و يهنيهـا
هذي ظروف الزمن والعالـم بأسـره *** مافـرح أفــلان أفـلانـه يبكيـهـا
عايش بدور المثالي نافخـن صـدره *** كنـه فهـم دنيتـه بأشمـل معانيهـا
مايدري أن الهوى له دور في عمـره *** فتره مـن العمـر لازم لـه يقضيهـا
مريت صدفه ولكـن صدفتـن قشـره *** من صوب مكحولة العينيـن زاهيهـا
ناظرت رمشه وكن في رمشها سكره *** العيـن حـورا وواسعتـن عراويهـا
امدعجه سود مهره من بطـن مهـره *** البرقع اللي كسـت لـه مـا يغطيهـا
تستأذن الشمس لامنـه سنـى بـدره *** والليل يكسي متونـن جـت تماريهـا
متستره بس وين الستـر فـي ستـره *** شيء ٍ فضح مشيهـا للـي حواليهـا
خطواتها خطـوه وخطـوه وتتشـره *** الخطوه اللـي بعدهـا مـا تخطيهـا
ماني مزود بوصف المهـره السمـره *** أوصافهـا كلهـا بالقـلـب كانيـهـا
مير البلا نارهـا بالجـوف مستعـره *** (( والنار ماتحرق إلا رجل واطيها ))
حبيتها والهـوى لـه حكمـه وأمـره *** عشت الليالي نكدهـا مـع مصافيهـا
جربت وشلون مر الحب مـن مـره *** وعرفت قيمة عيونـي يـوم الاقيهـا
اغراني الوقت وطبع البنـت مغتـره *** في حسنها ماخلـق بنتـن تضاهيهـا
يانعنبو القلب لأرخى بـأول النظـره ***لـو رفعـه صاحبـه لازم يوطيهـا
والدمعه اللي بوسط العيـن منحسـره *** بهلهـا يــوم فرقـاهـا وبعميـهـا