وش رايك استاهلك
[poem=font="Simplified Arabic,5,#3100FF,bold,normal" bkcolor="" bkimage="" border="none,4,#400000" type=2 line=0 align=center use=ex num="0,#400000"]
كلمتها في صوتها نبرة حنان = قالت هلا وعندي هلا تسوى الكثير
في صوتها الدافي وطن فيه الأمان = لملم شتاتي وشتت الهم الكبير
حسيت لحظتها تبسم لي الزمان = ومن فرحتي ودي مع النسمه أطير
سجيت ثم اطلقت للفكر العنان = وصلت لين أقصى نهايات الأثير
شاهدت شي ماتخيله الجنان = وابحرت في مايستثار ومايثير
شاهدتها كالطيف في نفس الأوان = بكفوفها فلت جدايلها الحرير
عجبت مما تصنع كفوفٍ ليان = تنظم نجوم الكون في العقد المثير
تطوي خيوط البعد باطراف البنان = تنسج شعاع الشمس في الروض النضير
في ثغرها المرسوم مصقول الثمان = تحكي وميض البرق في الليل المطير
جبينها يقطر مِثِل حب الجمان = يزهي سناه ومن سناها يستنير
قوامها المياس كنه غصن بان = حسيبها الله لاتثنت في المسير
بعيونها النجلا بريق السحر بان = وقف سحر هاروت عنده مستجير
فيها بلاغه جاوزت وصف اللسان = قريت كل اسراها لين الأخير
لدت لي ونادت وما قد كان كان = أرحب فضا كانت وانا فيها الأسير
عاد الأمل واشعل لواهيب الكيان = كيف اجتمع في داخلي برد وهجير
كني معاها جالس بنفس المكان = تغمرني النشوه ونفحات العبير
وكني ملكت الكون يوم الوقت زان = والحظ وافى السعد في وجه البشير
زرعت هالدنيا بساتين وجنان = وارسلت في كل النواحي لي سفير
قلت اغتنم وقت الرخا واعلن بيان = واخذ من اموال الغني حق الفقير
صحيت والا اني أردد ليل دان = لا العير انا فيها ولا ني بالنفير
واثري بدنيا كل مافيها امتحان = بقدر ماتعطيك تاخذ ماتعير
مالي ومال الناس قاصيهم ودان = من قال ماتوا جوع والدنيا بخير
ماهو فقير اللي يموت بلا هوان = ولاهو غني من عاش بامواله حقير
أمعنت في حبك النقايض بامتكان = حتى زعل مني الفرزدق مع جرير
في نفسي القدرة على كسب الرهان = ودك تقع ياحاسدي والا تطير
تنصفني اشعاري ويسعفني البيان = لاصار قاضي العدل ماعنده ضمير
أنا البحر لاقالوا الشاعر فلان = ماهمني لازاد منسوب الغدير
أكبر بحر موجه توقف واستكان = في ظل بحري صار مجهول المصير
هذا انا ياسيدة كل الحسان = وش رايك استاهلك والا مايصير
ردت علي بصوتها الضافي الحنان = بكلمتين اغنت عن القول الكثير[/poem]
|