فمان الله يا همس القوافي ..مرقب الخلان
موادع شاعر ٍ دمعه على وجنة طواريقه
موادع شاعرن لا جر صوته باعذب الالحان
بكت عين ٍ كفر فيها السهر واغرق بها ضيقه
موادع والليالي لو تناحب ثم تبيح أحزان
وحلم البعد في نومي وجب ّ فالعمر .. تحقيقه
طويتك يالدروب اللي بصدري ضيعة الولهان
عقب ما تاهت اقدامه ولوعه في معاليقه
سنين ٍ كنـّها لحظه ولو ان العمر له .. فان
وانا مؤمن برب ٍ ما نسى جملة ّ مخاليقه
ولا ياصاحب ٍ سقت العتب و تضيق به وديان
فمان الله لا تكثر على قلبي تشافيقه
عساي انسى .. وليت .. انسى .. وليت يضمني نسيان
وعساك تحب ّ غيري والزمن كثروا عشاشيقه
طعنتك طعنة ٍ ما ذاقها عبر الزمان انسان
وحظي من رداته زاد في جرحك وتعّـميقه
الا وشلون نبحر يوم مركبنا بلا .. ربان
وموج البحر لا يرحم ولا راف ابمغاريقه
توكل ّ يا حبيب الروح وأنا لي ظلمة الاكفان
ولا تبكي على شاعر رحل كثرت تشاهيقه