[عالمي زهران]

اليوم تمر ثلاث سنوات يابوي وانت غايب ,,
اليوم راحت ثلاث سنين وحنا ماشفناك ,,
يالله وش كثر اشتقنالك , يالله وش كثر فقدناك ,,
اتذكر وش كثر كنت حريص تبينا حولك , اتذكر وش كثر تزعل لاغبنا عنك ,,
اتذكر هوشاتك واتذكر نظراتك ,,
كنها الحين يوم تهاوشنا لخطانا ,,
وكنها الحين يوم تناظرنا لتعاتبنا ,,
اشتقنا لقسوتك واشتقنا لحنانك ,,
الحين عرفنا ليه كنت قاسي ,,
والحين فهمنا ليه كنت طيب ,,
قسوه في مكان وطيبه في اماكن ,,
وياشوقنا للمكان وياشوقنا للاماكن ,,
وينك يايبه وينك ..
نبي هواشك , ونبي نظراتك , محتاجين لقسوتك فقدنا حنانك ,,
وينك نبيك زي مانت يايبه ,,
تذكر يايبه يومك تنزل الين عندي تطمن علي , تذكر يوم تحط ايدك على راسي تخفف علي المرض , تذكر يوم حبيت كفك ولو فيني حيل ذيك الحزه حبيت اقدامك , تذكر ..
تذكر يوم زعلتك وخيبت ظنك فيني ومع ذلك وقفت معي وساندتني الين وقفت من جديد ,,
تذكر يوم تنزل دمعتك وانت بالسرير وتقول تكفون ودوني البيت لاتخلوني هنا ..
تذكر يوم طلعتك حديقة المستشفى انا وخالد الله يجزيه خير وتقوله ودني البيت ولاحد يدري , تراني متابعك وشايفك يايبه ..
تذكر يوم تقول وانت بالحديقه لو اقدر امشي كان شردت منكم للبيت ,,
اتذكر فرحتك وبكاك لما دخلت البيت واتذكر سجودك وانت تبكي حمد لله على رجعتك للبيت , يالله وش كثر فرحتك يايبه وانت جالس وكلنا حولك ..
تتذكر يوم تقول انا ادري وش فيني وبعدين اقولكم , انت ماتبغى تعلمنا عشان مانخاف عليك , درينا وش اللي فيك وكم بكينا خوفا عليك وانت ماتدري ,,
اتذكرك توصيني وصيه وتعلمني باللي لك واللي عليك وانا اقول انشاء الله انت بنفسك تعطي وتاخذ ..
دخلت ولقيتك تلف البيت غرفه غرفه , حسيت انك توادع مكانك يايبه , حسيت انك بتغيب عنا يايبه , وين بتروح وين ..
بعدها بيومين يايبه عرفت ليه لفيت عالبيت , وعرفت ليه اصريت تبي مكه , وليه وصيتني هالوصيه ..
عرفت انك لفيت البيت تودعه ..
وعرفت انك تبي مكه ليكون اخر اعمالك ..
وعرفت انك وصيتني لانك بتموت ..
مات ابوي , ابوي مااات , ماني مصدق الى الحين انك يايبه مت , ماني مصدق انك ماراح ترجع ...
ماقدر اصدق اني ماقدر اشوفك , ولااقدر اصدق انك بتغيب عنا للابد ...
فقدناك يايبه ...
اللهم ارحم ابي واغفر له وارحمه وعافه واعف عنه واكرم نزله ووسع مدخله وقه عذاب القبر وقه عذاب النار , اللهم بدل سيئاته حسنات واجزل حسناته حسنات واغفر له وارحمه يا ارحم الراحمين ......
ابنك
ابو سطام