رد: مذكرات الأعضاء (سجل ذكرياتك هنا )
السلام عليكم
صحيت الساعه 4.20 لصلاة الفجر
صليت ورحت جبت اغراض للبيت وفطائر وعصيرات للفطور
رجعت حطيت راسي تقريباً ساعه وصحيت سويت رياضه شوي على الجهاز
اخذت دش وفطرت وخرجت
بس تقريباً 3 كيلو واتذكر الجوال
دورت عليه مالقيته وعرفت اني نسيته
قلت فكّه وجات من الله
اصلاً هالجوال مثل " بيجر " بقر الدينمارك معلق في رقابها
كل مابغوها دقوا عليها وجت
مايدق في فائده من يوم عرفته
وبس وطب في زحمه
45 دقيقه عند اشارتين تخيلوا عشان الاشارات تعطلت والله حتى مدير المرور بنفسه في الميدان << كيف حالنا بدون اشارات
وصلت العمل طبعاً متأخر
قابلني رئيسي المباشر
ها ياباشا خليت اللي يسوى واللي مايسوى يتكلم عليّ بسببك وينك ؟
قلت : صباح الخير اول شيء
الشيء الثاني انا عندي اسبوعين متفرغ بقرار المدير العام لأني بلجنه بقسم آخر يعني مو ملزم بالحضور هنا
انا يوم اجي هنا
اجي بس " support" .... بلع لسانه ومشي
تجمعنا ورحنا القسم اللي نعمل فيه
اخوكم رئيسهم
طبعاً قافله معه ماطيق شيء اسمه زحمه احس اني اختنق ومزاجي يتعكر
وحنا رايحين القسم مرينا ميني ماركت داخل العمل واخذنا بور هورس وبونتي وسنيكرز
قلت لواحد خذ مفتاح السياره تحصل افلام دي في دي جيبها لووووووووووووووووووووول
راح وجابها دخلنا وقفلنا وطفينا الانوار وحطينا فيلم " the Promise"
هدوء تقول في صالة سينما 
بلا لجنه بلا همّ
اصلاً كيف يشتغل الواحد وحالته قرف استغفر الله
ماخلص الفيلم غير على صلاة الظهر
صلينا الظهر
قلت عازمكم اليوم في بيتزا هت وش قلتم ؟
محد ردّ
قلت بس علامة قبول البكر بالزواج السكوت ههههههههههههههههههههه
تغدينا ورجعنا
سويت أذن وحطيت بصمتي ورجعت البيت تقريباً على العصر
صليت
وحطيت راسي ونووووووووم ولكم الله ماصحيت غير 9.30
قمت صليت المغرب والعشا
لقيت العشا جاهز
تعشيت
وطلعت للوالده والوالد وسلمت عليهم وجلست معهم شوي
عاد امي توصي عليّ في اشياء<< مابقول لكم
ياولدي انتبه
خلك رجّال وانا امك
الله يبعد عنك بنات الحرام واولاد الحرام
امش بشويش يوم اركب معك ماعاد غير ماركبت جنحان لسيارتك عشان تطير
وانا خارج جتني
ها تبغى شي ....ايه ابغى
عيوني لك وش تبغى ؟
قلت هات راسك ابوسه وبس
ونزلت لكم
ـــــــــــــــــــــــــــــــــــــ
|