[العندليب]

بسم الله ..

أنا جيت ..

اليوم الأحد .. مدري كم التاريخ .. لا تقولوا ليه الحين تعروفوا من المذكره ..

صحيت متأخر << ماجبت شئ جديد ..

طبعاً مانمت الإ بعد صلاة الفجر ..

صحيت 10 ونص ..

طبعاً لازم من دش سريع أبرد على كبدي

وصلت السياره الساعه 11 الإ ربع ..
حميتها شويه << مايحتاج حاميه من ذا الشمس ..

لا لازم عشان اشغل المكيف ..

شغلت المكيف ودي أبرد

درجه الحراره 44 ما اثق في السيارات أتوقع فوق الـ 50

المهم انتظر المكيف يبرد

ياهوه برد ..

هوى حااار أثاري الفريون مايشتغل ..

قفلت الأخلاق مع الحر ...

توكلت على الله ومشيت ..

قربت من العمل مابقي الإ ثلاث إشارات ..

فجأة وأنا واقف عند الإشاره ..

الإ والسيارة تقول هذا مكاني ..

أحاول اشغلها مافي أمل ..

طبعاً السيارة توماتيك .. يعني لا أحد يقول أنتعها

يازينك يالعايدي ..

المهم حاول حاول ماقدر ..

أخوكم في الله واقف في نص الإشاره ..

مافي مشاكل الخط ثلاث مسارات ..

شغلت الفليشر

ونزلت من السياره وقفت على الرصيف ..

العالم وراي تدق بواااري ..

وأنا أقول شوفوني هنيه ما أحد في السياره عطلاااانه

طيب ياخي ليه مشغل الفليشر عباطه يعني

المهم ..

دقيت على نقاله تجي تحط السيارة فوق ظهرها ..

قالي بتأخر ..

قلت طيب ..

الدوريات رايحه جايه من عندي .. ولا كأن شئ حصل ..

يالله يالله تواضع واحد ووقف ..

الأخ في الله واثق يبقى يدف السياره من ورى ..

وقفته وقلت خير إن شاء الله ..

قالي بنوخر السيارة من الخط ..

قلت والله لو تحفر ماتحركها من مكانه ..

وقفت بينه وبين سيارتي قلت هيا أذا فيك خير دفها ..

عابط وعابطت معه ..

قلت يا أخي العزيز قيمة الحساسات الخلفيه 10 ألاف ريال أي بما يعادل قيمة السيارة اللي إنت راكبها وبالسفتي بعد

كنه أقتنع ..

قلت يا أخي بدل المناقرة في ذا الحر أمنوا لي ناقله ..

قالي وش رايك أسوقها بعد ..

قلت والله إذا ماوراك شئ لا يمنع ..

حسيت إن ضغطه أرتفع

شوي وجا أخونا العزيز صاحب الناقله ..

قالي 100 ريال قلت ياخي والله مايسوى أني أكاسر معك في ذا الشمس حرك بس ..

لو قال وقتها 500 قلت تم

المهم واحنا نحمل السيارة على الناقله ..

فيه شايب فتح القزاز وعياله معه

قال ياخي ترى ممنوع تحمل السيارة أتصل بالمرور ..

قلت ياعم الله يسعد والله ماعمري غلطت على واحد كبر أبوي ..

يعني الله يسعدك ترى إنت شايف الحر ماهو وقت جدل ..

المهم أخذت سيارتي وعلى الصناعيه

دقيت على العمل ..

وقلت سلم على فلان وقل عبدالله يقول ماني جاي ..

قلت له ظرفي قال الله يستر عليك

وصلت الصناعيه الساعه 1 الظهر تقريباً

لا مكيف ولاهم يحزنزن

جالس انتظر محل الصيانه يفتح

كلمت هندي وقلت صديق هذا متى يفتح

قال هذا الساعه أتنين

قلت هانت بقي أقل من ساعه

أنتظر

الساعه أننين

ما احد جا

مر من عندي هندي والأخلاق قافله والحر آووووووووووووووه يالحر

قلت صديق هذا متى يفتح

قال صديق هذا بعد صلاه أعصر

قلت طيب

وقفت ليموزين قلت أقرب مطعم

قال 15 قلت فاضي بعد أنت ماسألتك على الحساب

أمش بس أمش

عاد اللي هونها أني من يوم دخلت الصناعيه وانا مدهر رسايل مع واحد صديق لي ..

سوالف وهروج

تغديت

ورجعت الصناعيه

طلع الخراب من الكمبرسر << صح كذا أسمه ..

المهم التكلفه الإجماليه مع شغل اليد 4 الاف ريال ...

قلنا يامُعين ..

ركبت ليموزين ورجعت البيت ..

حطيت راسي ورقدت إلى المغرب ..

صحيت صليت المغرب ..

أذن العشاء وصليت

تعشيت ..
وها أنا أكتب لكم معاناتي بقلم أزرق ناشف ..

في أمان الله ..