[علي السبيّه]

[align=center]يااهل الهوي ما عندكم قلب للبيع
يصبر على وصل الحبيّب وهجره
.
الوصل جمره تلذع القلب تلذيـع
والهجر نارً يشوي القلب جمـره
.
لحضات مفتونه بلقيـا وتوديـع
تحني ضلوع القلب وترجّ صدره
.
والقلب مستسلم مع الحال ويطيع
مرهون مابين الاسـى والمسـرّه
.
حتى ولو راعه من الشوق ترويع
ويناوب امره بيـن كـرّه وفـرّه
.
الحب غالب يفضح السد ويذيـع
وينقض الميعاد فـي كـل مـرّه
.
ما فاد راع الحب غير المواجيـع
يتالي الزفـره وصوتـه يجـرّه
.
دنياه ضاقت والفضاء جاله وسيع
لكن مـا يوسعـه بحـره وبـرّه
.
في دفتر العشّاق بصمه وتوقيـع
للعاشق اللي صوّبه سهم نضـره
.
يبات ليله في هواجـس وتلويـع
وهاجسه سيطر على كـل فكـره
.
مهما كتمت امره يجي يوم ويشيع
ياكم محبً بيّـح الحـب صبـره
.
سيف المحبه قطّع القلب تقطيـع
ياللي خلي ماالحب يكفيك شـرّه
.
مجنون ليلى مات من حبه اصريع
وقبله وبعده كم شكو ماالمضـرّه
.
من سار دربه لازم ايتوه ويضيع
واللي اقتدى نجمه بليلـه يغـرّه
.
دنيا بلا قانـون رادع وتشريـع
تدور بس خارج مسـار المجـرّه

كلمات/علي السبيه[/align]