[align=center]
.
.
.
.
.
.
.
.
.
.
( 12 )
دخلت فـ... الصحّ والغلطه
في ليل غامض وبين اقواس
( جاكيت ) وتزيّنه ربطه
والفين ( ليره ) وضيق انفاس
( 2 )
كانوا كذا : إثنين في مرقص الحيّ
والطاوله في شكل ماهو نظامي
قالت : أخاف احكي و( تتكلّبش ) ايديّ
قال : اي وربّي كنّ هذا كلامي
راقبتهم وآنا لوحدي ولا فيّ
الاّ زهق عاجز يشدّ اهتمامي
شرب شويّة كاس , هي شربت شويّ
وتسائلوا من بعد
موّال شامي :
وشهو المواطن ؟
قال : يعني ولاشيّ
طيّب , وش المسئول ؟
قالت : حرامي !
( 43 )
فــ... الركن زحمه فاضحه
والنور اقلّ من البصيص
شمّيت ريحه ناضحه
خمّنت ,
بس ماني حريص :
أعرف , لأن الواضحه :
ريحة عرق لحمٍ رخيص !
( 73 )
غصب انا جالس , ومو جالس هنا
غصب انا فارغ , ولكن ممتلي
في عقارب ساعتي : ليل وسنا
عاجز اعرف أيّها مستقبلي ؟
حزني الليلة مثل ( ياميجنا )
لو يغنّيها وحيد ومبتلي
بسّ مدري ليه هاللحظه أنا
في عيوني شيّ عن ( ناجي العلي ) !
( 30 )
في أوسط الصاله ( حذا )
يلمع , و ( كرش ) بـ.. بنطلون
طاح ( الجواز ) وهو كذا :
يرقص , وشلّه يضحكون
ماكنت عارف مين ذا ؟
ولاكنت عارف من أكون !
( 4 )
أهمّ ما علّمتني
ياخصر ذيك الراقصه :
إنّك إذا ماتنثني
بتصير :
جمله ناقصه !
( 22 )
أنوار حمرا / طبل فارغ وثرثار
عشرين تنّوره تعرّت , وملّيت
ضجّه
موسيقى تافهه
كذبة اشعار
لكن عجزت افهم أنا ليش غنّيت ؟
وفــ... بدلة ( الجرسون ) , ناقص كم إزرار ؟
عدّيتها يمكن خطا , بسّ عدّيت
والطاوله تهتزّ , ويثير مسمار :
صوت الصرير اللّي كذا مثل : ( ياليت )
لكن , أنا وين اقضي الليل لاصار
ماحسّ بي مرقص , ولاحسّ بي بيت ؟!
( 9 )
إلى هنا : وانتهت ورطه
فاض السهر مثل رغوة كاس
والراقصه تجمع ( النقطه )
وتوزّع الضحك لآخر ناس
وتمرّ دورية الشرطه
واقدام عسكر تــفيض نعاس
والليل في آخر اللقطه :
صامت عدا : ثرثرة كنّاس !
:
الشاعر / عبدالمجيد الزهراني
[/align]