خطوط فاشله بكل ماتحمله الكلمة من معنى ..انا حجزت جدة الرياض ذهاب اياب وطلعت مطار جده يوم الأثنين قبل الرحله بساعه ونص ( الساعه 11:30 مساءا) والرحله تطلع الساعه واحده الا خمس دقايق.. المهم على بال ما وقفت في السرى ووصلت عند الكاونتر لقيتهم قفلوا الرحله قبل موعدها بساعه وربع تقريبا؟!!! وقالوا الرحله تقفلت وماعندك الا تحجز انتظار على اللي بعدها رغم اني اشتريت التذاكر من الباحه ذهاب واياب..المهم قابلت واحد بالصدفه اعرفه ايام الدراسه وماقصر الرجال حجز لي على رحلة الساعة 30 :2 صباحا..المهم اني طلعت من جده ..خلصت اشغالي في الرياض ورحت المطار كمان قبل الرحله بس بساعتين المره هذي..المهم رحت علشان اقطع بطاقة الصعود للطائره الــ( boarding) واعطيت الموظف التذكرة.. قال لي حجزك محذوف؟؟ قلت ليش ؟؟ قال لأنك طلعت على رحلة غير رحلتك من جدة والنظام في هذي الحالة يحذف الحجز تلقائيا اذا ماأكدته..
اذا مااكدته؟؟ طيب انا اش دراني انه لازم أأكده مره ثانيه؟؟ وصاحبنا اللي في جده ماقال لي ..
قلت له طيب وش الحل ؟؟ قال : مافيه الا انك تحجز انتظار على رحلة الساعه 6 الصباح..المهم رحت لمكتب الانتظار وحجزت انتظار على رحلة الساعه 6 الصباح وجلست بالمطار الين الساعه 6 ..بعدها قالوا لنا ان حجز الانتظار على رحلة جدة حولوه على رحلة الساعه 9 ( احولت عيونهم ) رحت لمكتب طيران ناس وسما بالمطار.. سما مااحد موجود.. وناس قالوا مافيه الابعد اربع ايام..المهم قلت ياولد شد حيلك وتلثم واركب نقل جماعي والله يعينك.. اتصلت فيهم ماردوا؟؟ طبعا يتغلون الاخوان..او انهم قاعدين يغسلون الباصات ويرهمونها عشان الغبار..
المهم بالصدفه دخلت على موقع الخطوط ع النت وشفت رحلات جده ..ولقيت فيه امكانية حجز على جده حجزت واخذت رقم الحجز ورحت طيران على الموظف قلت شف لي رقم الحجز هذا قال لي موجود ..قلت له عندي تذكره ذهاب على جده ممكن تحجز لي بها؟؟ قال لا.. لازم تشتري تذكره جديده ..مالقيت قدامي حل الا اني اشتريها واطلع (معذور قاعد ملطوع بالمطار 11 ساعة) ..هذي قصتي مع الخطوط السعوديه.. لكن ما أقول الا الله يقطع الاحتكار ويقطع السعوديه ولاتهون سما وناس اللي ماخذين طياراتهم مستعمله ورشوها بويه ووظبوا مكاينها وقالوا شركات طيران متطورة..
آسف جدا جدا على الإطاله ولك كل الشكر..