" كح " !
ليه وحده ليه
لا علبة سجاير :
تدري اش صاير ..
ولا فنجال هالشاهي :
يردّه
مبتسم .
نشوان ...
ساهي ......
يلفظ انفاسه ......
يباااسه .....
عزلته ....
كاسه .
وناسه
صار يحكي
صار يشكي
كَحّ
كَحّ
وهو لحاله
ما سمعه الا سعاله
لا وطن بيدينه يغطيه عن
هـ / البرد
لا شلة شباب
والله اظناه الغياب
وله عيون
وله عيون ...
وله عيون......
حييييل مشتاقه
يبي لو طفل يعبر
فـ .. اول الشارع
يبي لو بنت في طاقه
وآآآآآآآآآآآآآآآآآآآآآآه
آآآه ياكثر اغترابه
ماحدٍ قد دق بابه
مادرى وش يخلع اول :
وحدته ولا ثيابه!!!
:
:
" اضاءات في ليلة فندقيه " !
-1
نوال ...
واكتبك :
بنتٍ تدخل امرايه
فـ المشط تصعد ..
وحلم المشط :
ينزل به
شوفي : ..
حرقت اصبعي من نار غلاّيه
والشاي
.... لو بارد الفنجال :
أكمّل به
طفّايتي :يتم
......... ماهي بسّ طفّايه
سجايري : حزن
........... من قال انها علبه ؟
أدخلك :
طالب تلعثم في حروف آيه
واخشاب كل الكراسي
........ بارده
.............. صلبه
قولي :
عرفني ولد صايع
............... بلا غايه
قولي :
ولاني نوال ان ما أهبّل به...!
-2
ساعة جدار : معلّقه
.............. قل : بعيده
سكنت هالغرفه ...
وهي جات بعدي
دولاب فخم ....
وكم ملابس جديده
أكشخ بها ..
وآقول من عاد قدّي
نفس الزمن
........ والأكل
...... نفس القصيده
قالت :
وش اللّي فيك ..
ونسيت ردّي !
والصفحه اثنعشر ..
بـ هذي الجريده
اشعر بها ...
لكن شويّ وتعدّي
والله ..
وغصّة هـ السرير الوحيده
أنه سرير اثنين ....
وآنا لوحدي !!
-3
نوال ...
لا تسكتي ...
وتكلّمي واجد
تكلّمي : أكذب الأشيا ...
هو الأصدق
حزين انا ...
وأسألي لو صاحبي ماجد
عن وحدة الساعة خمسة الفجر
.... في فندق!
-4
يعني متعكّر مزاجي
وآآآه
كم حاجه تعكّر
يعني موناقص كلام الناس
... مو ناقص قرف
قل : حزين الليل ...
قل : ليل الوحيد اللّي يفكّر
كم من الراتب يوفّر ...
كم من الراتب : صرف
ما يجيك الاّ انت ...
تفتح باب هالغرفة
................. تسكّر
يا وحيد تعدّ ..
كم حذيان قدّام الغرف ...!
-5
وربي ....
واتصالات الرسبشن
وآخري
.... ونعاس
تذكّرني نوال بشيّ
....... كنّه شي يشبهني
كذا :
يتحرك المعجون في وجهي
.... كذا : الأمواس
أثاريني كبرت ....
وما لقيت اللّي ينبّهني
تقول أمي توجّهني :
ولد اصحك تسبّ الناس
لقيت الناس لكنّي
..... فقدت أمٍ توجّهني !
:
:
" أكل عيش " !
لو يقولوا
الأبيض اسود
قلت : صح
لو يقولو
الأعمى مبصر
قلت : صحّ
صح ح ح ح
لين ماهالصوت :
بحّ
ماقدر اسأل :
هذا ليش
.. وهذا ليش
أصل هالدنيا : اكل عيش
لو سمعت بأذني ../ كذبه
لو لمحت بعيني ../ غش
ما اقدر اصرخ
... أو أقاوم
. أو اشتّم
أو احشّ
آنا في الأخر
...... مواطن |
لا أهش ولا أنش ّ !!
:
:
" اوراق متساقطه في مرقص الزبداني " !
( 12)
دخلت فـ ... الصحّ والغلطه
في ليل غامض وبين اقواس
( جاكيت ) وتزيّنه ربطه
والفين ( ليره ) وضيق انفاس
( 2 )
كانوا كذا : إثنين في مرقص الحيّ
والطاوله في شكلماهو نظامي
قالت : أخاف احكي و ( تتكلّبش ) ايديّ
قال : اي وربّي كنّ هذا كلامي
راقبتهم وآنا لوحدي ولا فيّ
الاّ زهق عاجز يشدّ اهتمامي
شرب شويّة كاس , هي شربت شويّ
وتسائلوا من بعد موّال شامي :
وشهو المواطن ؟
قال : يعني ولاشيّ
طيّب , وش المسئول ؟
قالت : حرامي !
( 43 )
فــ... الركن زحمه فاضحه
والنور اقلّ من البصيص
شمّيت ريحه ناضحه
خمّنت , بس ماني حريص :
أعرف , لأن الواضحه :
ريحة عرق لحمٍ رخيص !
( 73 )
غصب انا جالس , ومو جالس هنا
غصب انا فارغ , ولكن ممتلي
في عقارب ساعتي : ليل وسنا
عاجز اعرف أيّها مستقبلي ؟
حزني الليلة مثل ( ياميجنا )
لو يغنّيها وحيد ومبتلي
بسّ مدري ليه هاللحظه أنا
في عيوني شيّ عن ( ناجي العلي ) !
( 30 )
في أوسط الصاله ( حذا )
يلمع , و ( كرش ) بـ.. بنطلون
طاح ( الجواز ) وهو كذا :
يرقص , وشلّه يضحكون
ما كنت عارف مين ذا ؟
ولا كنت عارف من أكون !
( 4 )
أهمّ ما علّمتني
ياخصر ذيك الراقصه :
إنّك إذا ماتنثني
بتصير :
جمله ناقصه !
( 22 )
أنوار حمرا / طبل فارغ وثرثار
عشرين تنّوره تعرّت , وملّيت
ضجّه
موسيقى تافهه
كذبة اشعار
لكن عجزت افهم أنا ليش غنّيت ؟
وفــ... بدلة ( الجرسون ) , ناقص كم إزرار ؟
عدّيتها يمكن خطا , بسّ عدّيت
والطاوله تهتزّ , ويثير مسمار :
صوت الصرير اللّي كذا مثل : ( ياليت )
لكن , أنا وين اقضي الليل لاصار
ماحسّ بي مرقص , ولاحسّ بي بيت ؟!
( 9)
إلى هنا : وانتهت ورطه
فاض السهر مثل رغوة كاس
والراقصه تجمع( النقطه )
وتوزّع الضحك لآخر ناس
وتمرّ دورية الشرطه
واقدام عسكر تــفيض نعاس
والليل في آخر اللقطه :
صامت عدا : ثرثرة كنّاس !
:
:
" كلب كويس " !
لمّا الكلب
العربي ( يقول )
بس ما ( يفعل ).
كلب رئيس أمريكا
( يزعل )!
كلب رئيس أمريكا يحزن
كلب رئيس أمريكا يفرح
كلب رئيس أمريكا يسمع
كلب رئيس أمريكا يسمح
ماهو مثل الكلب العربي :
دايم ينبح !!
كلب رئيس :
البيت الأبيض يا إخوان
يؤمن بحوار الأديان
يؤمن بزوال الطغيان
يؤمن جداً بعدالة
توزيع الثروة
يؤمن بضمير الأوطان
كلب رئيس البيت الأبيض
كلب ( إنسان ) !!
كلب رئيس أمريكا : بوش
له كلمة ..
له رأي وصوت
يحياا كلب رئيس أمريكا
وباقي كلاب الأرض :
تموت !!
كلب رئيس البيت الأبيض
كلب ( مؤهل ) يصبح ريّس
متحرّر
متمدن ..
راقي .......
متفتّح .........
متطوّر ...........
كيّس ................
كلب رئيس أمريكا فعلاً :
كلب كويّس !