[مـ ـخـ ـرِبـ ـهـ ـآ]

" شايفك " !

شايفك
شايفك ..
بسّ مدري وين ؟
مدري شفتك فـ ابتسامة
أو فـ دمعة عين
مدري في ربكة مراهق
راسمٍ فوق الورق
قلبين !
مدري شفتك
فـ ارتجاف ايدين
والاّ وشوشة غصنين
والله انّي شايفك
أو شايفك
بسّ مدري وين

:
:


" والآمين ؟ .. والآمين ؟ " !

ملاحظة اولى : طريف , طلعة التمياط , عرعر : مدن ومواقع بشمال المملكة .
الاهداء : إلى الأخ والصديق الشمالي الجميل : سلطان مطارد الرويلي .




يا سلطان مطارد آسف
خلّ اليتم
وخلّ القهر
وخلّ الحزن
والاّ :
اسمح لي بالإذن .
يا سلطان أرجو ,
أرجوك
واللّي يحفظ دلّة صفرا , قبل تميل تصبّ القهوة
صبّت آخر وجه لأبوك
يا ابن الريح ,
اللّي تهبّ من اقصى طريف
حتى عرعر
حتى ( طلعة ) لو هي ( نزلة )
معروفة باسم التمياط
خلّ شناط الراحل ذكرى
للّي راحل دون شناط
وشهي الوحشة غير الذكرى , تتدحرج وتروح وترجع
والذكرى : كرة المطّاط
يكفي يتم
ويكفي قهر
ويكفي احباط
عديّها ,
صدقني تعدّي
والحزن ( المرّ ) , الاّ يـ ( مر )
او طنّش مثلي , او كيفك
حزنك , وانت بحزنك ( حُر ) .

.
.
.

يعني لو باحسبها زين
ابكي مين
والا
مين
ابكي من ( ممنوع اتنفّس )
والاّ
( ممنوع التدخين )
ابكي من فرحي بالحزن
والا
من حزني عالفرحة
أو أبكي وطني يعطيني ( ارضي )
ويسمّيها ( منحة )
ابكي رجلي
والا
دربي
والا
الشبشب
ابكي ظلّي تحت الشمس
والاّ ظلّي بعد المغرب .

.
.

ابكي بأيّ لغات الدنيا ؟
يعني ابكي شمال يمين
والا اعكسها يمين شمال
ابكي إناث انصاف اناث
والا رجال انصاف رجال
ابكي نومي
بسريرٍ ضحلٍ واسفنجي
ابكي عربي
والا افرنجي
ابكي ابكي ؟
والاّ ادخّن , وآخذ لي فاصل اعلاني
واريّح ظهري , وآتكّي
اصرخ ياخي
والا صراخي مايتعدّا ( حلق ) صراخي
ابكي من واقع متخلّف
من شعراء مافيهم شعراء
وقصايد بلها , ممجوجة
ابكي الاثواب العريانه
والا الاجساد المنسوجة .

.
.

ابكي تسريحي في همي
وفـ لمعة فنجال الشاي
ابكي بدوني
والا ورايه
والا معاي
ابكي عجز المديونين
او
اغلال المسجونين
ابكي كاف
والا صاد
والا نون
والا سين
ابكي الظلم الظلم الظلم
والاّ
حربي معاي بسلم
والا الحلم اللّي صحّاني – قبل ينام – من احلى حلم
ابكي ( الأسهم )
والاّ ( هيئة ) نصب الاسهم
والا ضياعي بوسط شوارع
ملياته
لوحات وأسهم
غربتها تكنس في ناس
وبيوت لبرّا تكنسهم

.
.
.

يعني ( على طول ) ابكي والاّ
ابكي شمال
وثاني فتحة ادخل معها , وابكي يمين
وبعد امتار ( ادعس على دمعي )
لا , أقصد :
( ادعس على طول )
ابكي البترول المتدفق
والا الشحّ ( المتبترل ) بيد المسؤول
ابكي ( الجُبّ )
وبير الجُب
وغدر الجُب
ومن خلّوني
بغياهب ظلمات الجُب
والا
ذنبي , يسحب ذنبي , يسحب ذنبي
لين الرب .
أبكي كاش
والاّ
دين
والاّ
ابكي بالاقساط
ونتفاهم فيها بعدين
يعني لو باحسب هالحسبه
واحسبها
واحسبها زين
ابكي مين ؟
والاّ
مين
والاّ
مين
والاّ
مين



.
.
.
.

والاّ تدري , بطّلت ابكي
ذكّرني ابكي بعدين

:
:

" حادث مروع " !

أشرطه
منديل
دم
قالوا انّه قبل يتجاوز :
صدم
كان جثّه كان كومة
امنيات حالمه وثياب رثّه
كان واضح في عيونه :
ضيقته
.... فقره
........ ديونه
طلّعووووووووووه
من ورى اكوام الحديد
كان ناقص رجل واييييد
دوّروا له عن هويّه :
لقيوا حبّة بندول
.... وكمّبياله
وصرف ميّه !!

:
:


" سارة " !

صوتها خلخال في ساق المدى .
صبحها ملعون لاسابع ندى .
إن حكت تقدح زناد الغيم ويسيل الردى .

كلّ نظره من محاجرها غنى
للفقير اللّي يبي يحيا ليومه .
في شفايفها ينام الصحو , يصحا النوم من نومه !

آه ياساره , وثوب الحزن شقّقني وراح .
كنتي أكثر من يقول , إنّ باب الذنب مفتاح السماح !

آه ياساره .
كان وجهك يرتسم في كلّ شي .
في عصا البوّاب , في الحاره
فـ التفاتات البزارين الصغار , وفـ النقوش اللّي على باب العماره !

آه ياساره
كم تكلّمتي وانا أرقى السوالف : كلمه كلمه , حتّى أوصل للكلام اللّي فـ بالك مابعد
قلتييييييييييه ..
كنت ادوّر أيّ كرسي في كلامك , حتّى أجلس فييييييه !
والله أدري ، مااتّسع صدري لصدري
والله أدري : أنّي أدري , وأدري انّي كلّما ادري إنّي ادري صرت مدري !
ياجنوني

يالصباح اللّي نفض ريشه على سدرة عيوني
مابقابي غير عاشق علّق احلامه على شمّاعة العتمه على جدب الغمام
والتحف نفسه ونام !

:
:

" سكات " !

سكات , سكات
احس ان الزمن كذبة
وتهريج ودجل ونكات
احد مولاقي يتعشّا
وحد يتكلم بشيكات
ابد لا عدل , لا ذمة
زمن طاي , زمن ظالم
زمن واللي تبي سمّه
زمن حاير , زمن داير
زمن مو داري اش صاير
وش اتكلّم بـ :
اموت حمار ومبلّم
زمن كم هو لعب فيني
ولاني راضي اتعلم !