الرجل / هذي اختي وهذيك زوجتي :(
حوار .. كغيره من الحوارات ، إلا أنه يختلف هذه المره لأن مثل ما ينطبق عليه
وهو المثل الشعبي القائل : "اللي مايغدّي مؤمن يعشي كافر" .!
اقرئوا بتمعن هذا الحوار الأسري مابين سالم وسارة والابوين ...
سالم (عمره 15) : يبه ممكن تعطيني مفتاح السيارة ؟ باجيب دفتري من عند زميلي
ابو سالم (عمره 45) : لا والله ماني معطيك مفتاح السيارة توك بزر ماتعرف تسوق
لين علمتك السواقه عطيتك اياه .
سالم : 
سالم : سارة .. مابراسك طلعة اليوم تبين خويتك تبين مشغل شي ؟
سارة (عمرها 18) : لا والله مابراسي شي وضف وجهك خلني اذاكر ، لو بغيت مشوار ماوديتني
بس شكل براسك طلعة ، بعدين أنت من جدك توديني ! تصدم بنا في جدران الحارة مثل ذاك اليوم
يوم تسرق مفاتح سيارة ابوي وتآخذني معك عشان المرور مايمسك يالتعبان >>> ملسونه هالبنت
سالم : ياخسك خسااااه ، والله أن تجين بكرا تقولين ودني لحصة والله ما اوديك .. طيب
بعد مرور 6 ايام
سارة : سالم .. تكفى يابعد الدنيا ودني لنورة عازمتني للعشاء أنا وصحباتي ، أنا باسرق المفتاح هالمره
سالم : إيــــه .. جيتي الحين تطلبيني ، طيب كم تعطيني واوديك ؟
سارة : باعطيك 10 ريال يالخايس ادري بك بتروح تتتن >>> ياكثر التاءات يالله طلعت منها
(سرقت سارة المفتاح و 5 ريال من بوك الشايب ووداها اخوها بعد ملعنة عشان اتهمها انها مادورت زين 10ريال)
السيارة (عمرها 1981م) : ورررررر وررررررر طيران عشان الشايب مايمديه يفقد المفتاح .
( رجعت سارة مع صاحبتها حصة جابهم اخو حصة وارنبت على الشايب أن حصة اللي ودتها) >>> شديد الشايب
بعد مرور 6 سنوات .. عمر سالم 21 ، عمر سارة 24 ، عمر ابو سالم 51 ،
عمر السيارة انتهى وجابوا غيرها جمس موديل 1996 >>> يقال لهم الحين سيارة جديدة
طبعا سالم صار طالب بالجامعه وعنده سيارة هونداي موديل 2000 >>> الشايب مدلله .!
سارة : سالم .. تكفى ودني السوق ، قرّب عرسي ولا جهزت شي !
سالم : اقول اعتمدي على نفسك مالقيتي إلا أنا اوديك >>> جملة ممنوعة من الصرف 
سارة : شـ دعوى سالم اعتمد على نفسي .. شايفني خويك اروح ادور لي ليموزين يعني
وأنت عارف ابوي مسكين شوفه شجر ولا يسوق بالليل >>> تلك الايام نداولها بين الناس ....
سالم : اقول والله والله إن مانقلعتي لأفقع وجهك >>> جامعي ومهايطي بعد
حوارات جانبية من نوع التشكي لكل من سارة وسالم مع امهم / أم سالم (عمرها 47)
سالم : يمه قول لي لسارة لاعاد اشوف عبايتها على الكتف ولا تفتح نقابها بالسيارة
واصابعها .. شفتي اصابعها ؟ إن شفتها مكشوفة كسرتهم وووو
أم سالم : طيب ياولدي ابشر باقولها ، الله يهديها .. ترى وأنا امك كل البنات كذا
سالم : وش اللي كل البنات كذا ؟ يمه تبين ترفعين ضغطي أنتي ، بنطلون ماعاد ابيها تلبسه في البيت
أم سالم : طيب طيب بس قم صل العصر احسن لك واطلب ربك يصرف قلبك عن الدخان وانا امك
سالم : 
بعد مرور 6 شهور
سارة : يمه سالم ماعاد يوديني لمشاويري الضروريه
ولا يسألني وش تحتاجين .. وين سالم هذاك اللي كان يحبني ويودينا نتمشى ونتعشى برى البيت  ..
أم سالم : يابنتي اصبري ، كلها كم اسبوع وتتزوجين وإن شاء الله ربي يعوض عليك ببدر ويصير يخاف الله فيك >>> بدر خطيب سارة
سارة : >>> متى بس اتزوج وافتك .! 
( تزوجت سارة بعد ماراحت للسوق 5 مرات فقط مع ابوها اللي مايوديها للسوق إلا الصباح
تعرفون هي متخرجه منطقه في البيت وابوها متقاعد حالته حاله ولا يشوف زين بالليل )
وبعد مرور 6 سنوات >>> اعمارهم عليكم الحساب 
( سارة توفقت مع بدر ولا هو مقصر عليها بشيء وسالم بعد توه تزوج ،
ورجع ابو سالم وام سالم يعيشون لحالهم لولا زيارات سارة وزوجها الحنون
ليتفقدون احوالهم يوم بعد يوم ، ولأن سارة توظفت جابت لأمها شغالة ، وهالشي محسسها بالامان )
راحت سارة لأهلها بتجلس عندهم شهر لأن زوجها منتدب خارج المنطقة وشافت العجب العجاب ..
سارة : يوووه يمه وش ذا ؟ الحين اماني "زوجة سالم" كل مرة لبسها كذا خليع قدامكم انتي وابوي ؟
أم سالم : ايه يابنتي ياما قلت لسالم يفهمها لاعاد تلبس قصير وعريانه كتوفها وبناطيل محزقه وقصيرة
سارة : من جدك ؟ تلبس برمودا قدام ابوي ؟ الله يالدنيا ياسالم يوم كنت البس بنطلون واسع
وبلوزتي لين ركبتي كنت تحش ارجولي حشششش ..!
أم سالم : مابعد شفتي شي يابنتي .. لكن الله يهديهم ، اهم شي فاكينا من مشاكلهم ومتراضين >> اكبر همها
بعد اسبوع "يوم خميس" جا سالم وزوجته اماني لبيت اهله عشان الغدى العائلي وبعد صلاة العشاء :
اماني (عمرها21) : هاي سارة .. توصين شي بنطلع نتعشى بالريف الإطالي ويمكن نمر على السيفوي ..
سارة : لا حبيبتي سلامتك مابي شي .
اماني : باي قلبو
سارة : فمان الله .
بعد مرور ساعة .. خرجت ام سالم من غرفتها كانت تصلي وجلست مع بنتها
سارة : لا لا يمه ماني مصدقه اللي اشوفه يووووووه لا لا عطوني باندول بلص ياناس
أم سالم : سلامات ؟
سارة : ماني مصدقه أن سالم يرضى تطلع زوجته بهالعباية المزركشة والضيقة وبالبنطلون بعد
لاااا ويمه متكحلة زين ولابسه نقاب واسع بدون غطى ! وش مسويه له لين قلبت راسه .؟!
أم سالم : هههههههههههههه ياحليلك ياسارة ماسوت له شي ، الحين لو تلبسين مثلها مو بقايلك شي .
سارة : وش السبب طيب في هالتغير المفاجئ ؟ وين راحت غيرته ؟ تذكرين يمه يوم يهاوشني على عباتي
ذيك الواسعه بس عشانها على الكتف .. تذكرين ؟
أم سالم : ايه اذكر .. إيـــــــه يالدنيا ، قومي صلي العشاء ازين لك وخليهم لا تفكرين بهم واجد ترى يشيب راسك
سارة تتكلم مع نفسها بصمت ..
والله لو ادري أن اخوي بيصير كذا بلا تعقيد وراعي طلعات ووناسه كان مزوجينه من زمان
>> يالخبله وش اللي مزوجينه من زمان ، اصلا لو اقوله الحين بناتي يحتاجون شي ماجابه لهم
يمكن اخوي ماكان يحبني وكل هذيك التصرفات مو غيره بس لعانه .. هذا هو يحب زوجته
>> يؤ .. نسيتي يوم تقول امك لو تلبسين مثل زوجته ماقال لك شي ..
شكل بدر "زوجها" هو الثاني محجر على خواته من اول بس يوم تزوجني هدت سيطرته عليهم
>> في ذي معك حق لأني اذكر مره اخته هدى اشتكت من سيطرته عليهم زماااان .!
ـــــــــــــــ انتهى الحوار ــــــــــــــــ
القصة من تأليفي والاسماء الواردة ماهي الا من نسج خيالي
لكنها قصة واقعية 100 % وتحدث في اغلب البيوت السعوديه من ذوي الطبقات الوسطى
سمعتها من فتيات كثيرات وتعايشت مع بعضها من القصص داخل قلب الحدث مع بعض قريباتي
فتعالوا نناقش هذه القضية التي يجب علينا التسليم بوجودها ومعرفة اسبابها للوصول إلى حل إن امكن .!
بنظركم اخوتي / لماذا تحدث مثل هذه الدورة الحياتية للشباب في تعاملهم مع اخواتهم وتغيرهم بعد الزواج ؟
اخواتي / هل تتوقعن أن الخلل في الاخوات وطريقة طلبهن لحاجياتهن ؟
اخواني اخواتي ..
هل تختلف غيرة الرجل على اخته عن غيرته تلك التي على زوجته ؟
وهل الجانب العاطفي مع الاخت والذي يقابله جانب رومانسي مع الزوجة هو القاسم المشترك في تلبية الرغبات وتغير مستوى الغيرة ؟!
وما سر تسلط الاخ على اخته بينما يرخي الحبل لزوجته ، وقد يصل تسلطه عليها حتى بعد زواجها
من باب فتل العضلات امام زوجته ؟!
اسئلة ليس بالضرورة الاجابة عليها بقدر ما أنا اضع لكم محاور للنقاش حتى لا نتخذ لنا مسارا ً آخر خارج النص ..
" وجهات نظركم لو سمحتوا حول هذا "
وشكرا ،
طوق الياسمين
ـــــــــــــــــــــــــــــــــــــ
|