سلام عليكم ورحمة الله وبركاتة
الزمان : صيف عام الف واربعمائه وعشرة للهجره
المكان : ديرتي الجميله وقريتي الوادعه في بلاد جدي الله يرحمة وبالتحديد تحت السدرة الكبيرة اللي على محرف الماء
جت بنت جيراننا بخيتة ورمت السدرة بحجر تبغا تتنبق ولكن بالصدفه السدرة كانت محملة بالحجارة واختكم الشيطونه جالسه تحتها تتلقط النبق وفجأة طاح هذاك الحجر وفلقني فلقة سالت على اثرها الدماء..
ولم تكن تذهب تلك الدماء سدى فقد اخذني جدي وراح بي للمطوع حق القرية عشان يثمن الدم وثمنه باربعين ريال..
ودارت بي الايام وبينما انا سادحه فوق السهوة بخريف عام الف واربعمائة واثنان وعشرون وانا اطالع بالسماء والنجوم واتخيل الدنيا بس قريتنا والوادي ومراعي الغنم يعني لو حسبناها يمكن ماتجي عشره كيلو بعشره كيلوا لاني بصراحة لم اؤمن بما قرأتة في الكتب من وجود عالم اخر او مايسمى بالمدينة..
برأيي كانت افضل سياره هي وايت جدي الله يرحمة..
وفجأة قلت الحين ياغربة انولدتي بهالشعيب وبتتزوجين بهالشعيب وبتموتين بهال الشعيب..الله يخلف عليك..
وتدور الايام ويجي يخطبني واحد من خارج العايله وبين عشية وضحاها وانا بعالم ثاني لم استوعبه..
فقد كنت متعوده على بنات ديرتي المحتشمات وعلى عيال قريتنا اللي يتميزون بالعفه والشهامة..
وكنت متعود على قريتنا اللي تنام بحوالي الساعة التاسعه بايام الاجازه والثامنه بايام الدراسه..
كنت متعوده على اللبس المحتشم والعبايه والغطا وشيء بالعربي اسمة العيب..
هيا تخيلوا عاد باول ليله اطلع فيها الى تلك المدينه الحريم نصف مفصخ والنص الثاني قريب منه..
تبويس وتعري على الهواء مباشره
مالكم يمين فركت عيوني واطالع ..
يابنت لايكون حلم...لالالالا مو حلم هذا اضنه عالم ثاني..
وادق ضهر زوجي واقول طالع طالع..قال يابنت فقعتي خاصرتي باقي ماشفتي شي..
قلت وشو؟؟؟
اذا نص مفصخ وماشفت شي اجل وش باشوف تقسيخ كامل؟؟
المهم ومانخاطي بها ذلك المرقص اللي الله يتوب علينا..
المهم واخزن كل مارأيتة بمومري الذاكره اللي بمخي قلت ربما احتاج له بكرة الايام..
وتدور الايام..
ونسافر لمدينه سعودية يقال لها العاصمة ..
هناك رأيت مشاهد للتعري لم ارها من قبل..
ليس تعري بالاجسام وانما بالاخلاق..
فهناك غني بذخ انفق امواله على سفراته للبنان وماجاورها..وبالقرب منه شخص نايم فوق كرتون تحت الكبري..
وهناك شخص ملتحي الى فوق الركبه تراه متربع على كرسي المحكمة او غيرها وبالعصر تلاقيه يبيع في المخططات العشوائيه بمجرى السيول من اجل دنيا..
وآخر يقولون انه ولد مسئول والمصدر موثوق وقد صدم له واحد مسكين سيارته اقساط ويجي العسكري ويحط الخطأ كامل على الرجل المغلوب..
والطامه الكبرى باحد الاسواق ثلاث بنات لابسات العبايات ومن تحتها لاشيء وقد وضعن من مساحيق الجمال اخارجي ما اخفين به العيوب الباطنيه وقد جعلن من ذلك السوق مرتعا للغوايه والمصيبه وحده ابوها مسئول وامين بالدوله وهو قد ضيع امانه بيته..
وبينما انا اتجول واذا بطفل رضيع بجوار حاوية القمامة اوشك على الهلاك وقد تخلت عنه امة لتبحث عن طريق اخر لممارسه الهوايه المفضله وداست على قلبها ومن يدري ربما هي احدى الثلاث اللواتي بالسوق..
يارباه هناك ماذا ارى عجوز بالثمانين تحت الشمس اقتربت منها قلت لها لماذا انتي هنا يامي قالت انتظر ابني قلت طيب انتظريه بالداخل قالت لا قلت طيب اتصلي عليه قالت ليس معي تلفون قلت انا اتصل عليه معك رقمة قالت نعم مكتوب بهذه الورقه ناولتني اياها فاذا مكتوب بها من يقرأ هذه الورقه يذهب بهذه العجوز الى دار المسنين..
رجعت بعد يوم حافل بالمشاهد والقيت بجسدي المنهك بالتعب على فراشي وارخيت برأسي المثقل بالمآسي التي رأيت على مخدتي..
وتذكرت ديرتي وقريتي الامنه المطمئنه البعيده عن كل تلك المناظر البشعه ولسان حالي يقول:
وينك يابخيتي ..
ودي ارجع للزمان اللي مضى ,,
ودي ارجع وافلقيني يابخيتة..
لك براسي جرح والله مانسيته..
بس بارجع ..
بس بارجع..
وافلقيني يابخيتة..
بقلمي/غربة مشاعر