سلاااام
تصدقون .. الظاهر إني امر بحالة اكتئآب مؤقت واضطراب في الحالة النفسيه اللي سببوها لي الناس
خلوني ابدأ بالجوال وكيف كرهته
إذا رن جوالي .. ماعاد اهتم واقوم ارد لأن المتصلين يا اما بنت اختي تستهبل علي او خلود تسأل
وش صار على فكرة تكميل الماجستير وإلا سارة تشتكي من اهل زوجها وماتقفل إلا وراسي مصدع
وإلا امل اللي نفسها ماشاء الله مفتوحه للحياة كل مره تقول خلينا نتقابل بمنتزه نسائي والا بدرية اللي
فاضيه كل ماملت من سواليف خواتها دقت علي رنة وصكرت تبيني اكلمها من يومنا بالجامعه وهي ماخذه
عني فكرة اني كاش وبنت نعمه مدري من زرع هالفكرة براسها ! والا شركة زين كل يوم راسلين لي رسالة
يقولون عندك رصيد اضافي لكن والله والله ماتذوقينه ياطوق لين تكملين رصيدك المتبقي .. خخخخ
يعني افتكينا من نصب الجوال وموبايلي وطحنا بغثة "شين" !
بالله تلموني ؟ قسم بالله صرت اخليه على السايلنت وارمية فوق اقرب تلفزيون بالبيت عشان يخرب ويخرب التلفزيون معه
<<< قمة النذاله
يعني ماعاد يجيني اتصالات تبشر بخير وإلا وحده مثلا تتصل بس عشان تسأل عني وتقفل بدون مصالح وتشكي ووجع راس !
خلصنا من الجوال نجي للتلفزيون
كل ما افتحه إلا والكوارث البيئية تنكب علينا من كل صوب زلازل وفيضانات وحروب اهليه وتهديدات ودعايات كلها إحاءات "طوووووط"
حتى ولدي ابغى القاله قناة اطفال خاليه من الخرابيط الاحاءات والافكار الإلحادية مالقيت ، مسكين مدري وش بيطلع هالولد هو والجيل اللي معه
فتحت mbc3 إلا ولقطات وسخه ! فتحت سبيستون إلا والخزعبلات وابطال الديجيتيل اظن لو يتابعها ولدي بيحاول الطيران من فوق السطوح
اقول بنفسي باشغل له براعم والا الجزيرة للاطفال واللهم ياكافي مالهم ديانه محددة مركزين على الطفل ولا يربون بداخله اي روح اسلامية
قلت ماله الا قناة اجيال الجديدة والله انها زينة لولا ذاك الولد والبنت اللي معه مدري على اي اساس منقينهم المفروض مركبين لهم تقويم اسنان من قبل
طفينا التلفزيون وفصلنا الفيش كله من الجدار .. الين يتعدلون ويجيبون برامج زي الناس واخبار تفتح النفس .!
خلصنا من التفزيون وبادخلّكم الحين بمعمعة الشوارع
زحمه ياناس ولابغينا مشوار داخل الحاره ناخذ لنا نص ساعة مابين اشارات واكشن لمحاولات تصادم وبواري تجيب الصداع في الاذن الوسطى
اجل لو نبغى نسير على احد من الجماعة بالحي اللي جنبنا .. تقول بنسافر الخرج !
واحيانا انصدم بمنظر شاحنه داخل الحارة بعد العشا مدري هو مضيع الطريق والا الطريق مضيعه ..
اهم من هذا كله .. ودي افهم ليه كل شهر يحفرون نفس الشارع ويرجعون يردمونه ويزفتونه
المفروض يخلونه محفور على طول .. بس يحطون لائحه عشان لا يطيح فيها واحد مطفي النور
نجي الحين للمنتديات
الماسنجر ابشركم اعتزلته .. والمنتديات باقي افكر اعتزلها والا لأ ، والله ازعجونا بالحوثيين ثم بكارثة جدة والحين بفزعة الملك طول الله عمره
يعني إن خلاهم قالوا ماتصرّف مع حرامية البلد وإن تصرف قالوا يسكتون الشعب بالدراهم .. احس انه ماعرف لهم .. شعب مدري وش يحس به .!
الله اشغلهم بالحروب والفيضانات ماغير يبلون اقلامهم ويكتبون .. كنهم مادروا أن ماجد المهندس غنى لنا "ذا وطنا يالهبيل" >>> وش دخل الاغنية !
والله وتجيني ذيك الفكرة اللي مامثلها بالدنيا
اني اهاجر للمريخ حيث الهدوء والابتعاد عن صخب الحياة واهلها وباصير اجي الكرة الارضية كل ثلاث شهور اسلم على الاهل في الرياض وارجع
قررت واتصلت على مكتب الخطوط واحجز على كوكب المريخ ودرجة اولى بعد عشان اوصل بسرعه ، طبعا رفضوا اني اسافر بطياره قالوا في صاروخ
عندنا واقف تحت في الباركينق جهزت عفشي وبكيت شوي على الاهل ، كان ودي آخذهم معي بس المشكلة الصاروخ مايكفي الا شخص واحد ومن يوم اركب
لين اوصل وانا متمدده او واقفه آني وي المهم ماقدر آخذ معي احد هذا كلام مكتب الحجز لي >>> تخاف احد يتشره عليها
انطلقت بعون الله
كانت رحلتي الساعة 2 الصباح يوم الخميس ووصلت مطار المريخ الساعة 2وربع >>> قايله لكم تراي باركب صاروخ يعني مدة الرحلة ربع ساعة
وصلت ولقيني لابسه كذا
متى بدلت ملابسي او متى شريته اصلا هاللبس والله مدري !
ولقيت مكان العالم الله انه مكتب استئجار للدبابات .. المهم اني لقيت لي دباب بطل واخذته ورحت افرفر فيه بالمريخ لحالي ماحولي احد حتى المخلوقات
الفضائية اللي نشوفها بالافلام ماشفت شي منهم .. يمكن نايمين ، وآخرتها لقيت لي طعس وقفت دبابي فيه وهذي صورة للذكرى "صورته بجوالي"
لا تقولون من صورني لأني مسويه توقيت للكام وحاطتها فوق التل ّ
قمت عاد اسوي لي شاهي بالنعناع واحط لي شوية مكسرات شريتهم من الرفاعي مع اصبعين كيندر بوينو واضبط الجلسه عشان اروق
لاني حسيت اني اول مره انتعش لا ازعاج ولا ناس ولا دخان سيارات ولا روائح كريهه مثل ماكنت اشم يومي بالرياض
شوي إلا وصوت ألييييييم بغى يصمخ اذني .. واشوف من بعيد مركبه فضائية تبي تحط رحالها على ارض المريخ
وانا اقول بنفسي ياليل اليييييييييل اكيد هذولا بيكيمونات والا مخلوقات فضائية بتجي تهاوشني يحسبون اني بطق لي بيت شعر في ارضهم مايدرون اني بس ابي استجم
وقفت وانا خايفه .. وينفتح الباب .. من تتخيلون نزل علي من المركبة الفضائية ؟
قولوا مييييييييييين ؟
<<< مييييييييين !
والله مدري منهم
بس اي احد طفشته الكرة الارضية باللي فيها اكيد بيهاجر للمريخ وبيقول لنا وش مطفشه
هيا بنا الى المريخ حيث الاسعار الرخيصة والبنية التحتية الممتازة المزودة باجهزة تصريف السيول
والاخبار المفمعه بالخير والبركة ولكل مريخي راتب وقدره
ترى هناك اي شي تبغونه تحصلون عليه بسهولة : اراضي/وظايف/
حتى شوفوا هالحجازي شكله بعد كارثة جده رحل هناك يترزق الله ويبيع البليلة بريال ومخلله ومبهرة
وإلى لقاء آخر نكمل فيه باقي رحلتي أنا والشعب المهاجر إلى هناك ..
>> يعني افهمومها وش رايكم تهاجرون معي وتقولون وش السبب ؟!
