[طوق الياسمين]

يبدو أن كاتب المقال يتكلم عن زوجته ويعاني كثير منها .. اعانه الله
مع اني اتوقع ان هالنوعية من الحريم اللي تطالب بحقوقها ولا تنفذ حقوق زوجها قد انقرضوا


شوفوا يامعشر الرجال ..
لكل رجل تجربة قاسية يكون بالمقابل في 40 امرأة تعاني من تجربة قاسية والسبب أن كل واحد فيهم مايعرف وش اللي له ووش اللي عليه
اختلطت عليهم الامور والواجبات ....
صدقني أن صحراء الحياة الزوجية لن تخضر ّ وكل زوج او زوجة يتصف بالانانية ويبغى حقوقه ولا يبغى يقوم بحقوق الطرف الآخر
يعني يجي الزوج يقول سوي لي وافعلي لي بس لا تطالبيني بشي ابد إن اكرمتك فاشكريني وأن اهنتك اصبري لانك امرأة لا قامت ولا قعدت !!
الله يعين الرجال اللي عقليتهم كذا على انفسهم .. هذولا بيعانون كثير في حياتهم ..
لأنهم لو تزوجوا بنات ناس متربيات وعارفين حقوق الزوج ماراح يتوفقون فإما مشاكل مدى الحياة او طلاق
فماله الا حلين :
1- يتزوج وحده اشبه بـ "البقرة" يسرحها ويروحها على كيفه .. ومنطمه على شحمه طول السنين وماتطالب بحقوقها
وبما انها "بقرة" فالوكاد انه متوهق فيها لأنها ماتعرف للرومانسية والاتيكيت ولا راح تكرمه لا هو ولا اهله ولا ضيفه
2- ان يجيه يقين لا يعترف به الا داخل نفسه ولا يصارح به احد .. انه انسان عديم المسؤلية ولا ينفع للزواج .. وتاليته للحرام وهذا كفوه .. تعارف وعلاقات تليق بمقامه القذر




اما الرومانسية يالسعوديين ..
مع احترامي لكل سعودي .. ولكن بعضهم
* يبغى زوجته تبوسه وفمه مروح مايعرف شي اسمه فرشه ومعجون حتى المسواك اللي اربع اعواد بريال مايشتريه
* يبغاها تفرك ارجوله وتسوي له مساج وريحة ارجوله تنتف من الشراريب اللي يشخص بها تحت الجزمة قدام اصحابه "زين الخلاخل والبلا من داخل"
* يبغاها تجهز له الحمام وتعبي البانيو بالرغاوي وبتلات الورد ويجي يقول لها تحطيما لمجهودها "وش ذيه ؟ وش معك غزلتي ؟ انا مهلا باصب الما من فوق جلدي اليـّن به قلحي واخرج وانتي كفحتي موية الخزان كلها هنيه ، والورد ذيه لاكان بدل ماشريتي وردن بعشر ريال اشتريتي بها قشطه اذيتينا بالحلى كل يوم >>> يبغى حلى بس مايبغى يشتري قشطه !!
* لا استقبلته وهو جاي من العمل تسلم فوق راسه قال حيلي عني كذيه بغدي ارقد وسكتي ورعانك وكان ، خليني اغفى لين يقر غداك .
* يطالبها انها تكوي غترته عشان يشخص تالي الليل وتقعد تفرك فوق العمامه ساعتين كلها خيوط منتشه مره تنشب عليه في عروة الباب ومره في ساعته .. ويقول معيني اغيرها بتسدني لين اموت .. وهو داس له غترة محترمة داخل الدولاب مدري وش علمها ؟!
* تروح هي تتزين له وتلبس فستان بيت وشوية عطر وتتفاجأ به قاعد بفنيلة وسروال السنة فوق الكنب .. حتى العطر مافيه من قام يترشش به ولو تعطره هي نفخ فيها يقول مايعجبني ذيه العطر ، وهو بس يلقط وجهه بعد الفشيله


هذي حكاوينا يالحريم في المجالس .. ترى الحريم ملوا من ذا الحركات .. ارحمونااااا
تعطروا وتكشخوا وفرشوا اسنانكم واستخدموا ريكسونا خلونا نعيش مثل باقي الحريم العربيات