مدخل
تجين نموت ؟
يجوز ان الممات أحلى
غريبه من الممات نخاف
أحد منا سبق مات ورجع خبّر
وش اللي في مماته شاف ؟
يجوز ان الممات أحلى
مدام إن السنين إللي
قضتنا بالحياة إعجاف
يجوز ان الممات أحلى
" بطعم الكستنا والتوت "
تجين نموت ؟
يقولوا
والحكي في ذمة الراوي
بإن اللي يموت يعيش
تجين نموت ؟
ونفهم ويش
معنى " يعيش " ؟!
تعالي لحظه نتأمل
حياة الموت !!
يجوز ان الممات أحلى
تجين نموت ؟
تجين نموت ؟
نتكفن ؟
مدام أول فصل أبيض
أظن اللي بعد أحسن
وأظن فراق هـ الدنيا
سهل .. عادي .. ويتعوض
تعالي نجرب إنا نموت
ونفرح موووت
ونترك من يبي يحزن
لحزنه لو يبي يحزن
وحنا نموت
يجوز ان الممات أحلى
تجين نموت ؟
تعااالي
وانظري حولك
تبي قربي .. وأبي قربك
ولاني قادر أوصل لك
وفكرنا وفكرنا
وشحّت معظم حلولك
وانا حلـّي بـ إنا نموت
وبعد الموت نتلاقى
تعانق مهجتي سهولك
وخلينا من الدنيا
وخلي اللي يفوت يفوت
يجوز ان الممات أحلى
تجين نموت ؟
تجين نموت ؟
نتوفى ...
تعالي توسدي صدري
وخلي هـ الجفن يغفى
وأنا بغفى
إلين نموت
يجوز ان الجرح يشفى
بعد مـ / نموت
يجوز إنا اذا صحينا
بنصحى خارج المنفى
ونصحى في حياة الموت
ونبحر وحدنا ندوّر
على مرفى
بيقبلنا بامانينا
مثل ما احنا
يجوز ان الممات أحلى !!
تجين نموت ؟
مقتل
إفتح يا قبر بابك خلـص متنا شبعنا موووت
...................... نبي نبدى العشـق بدري نبي نزهر من ترابك
نبي نصحى شجر وارف نظلل تربتك بالتوت
...................... نبي لا هفـهف الغـربي ترفرف فوقنا اسرابك
أبي غصني اذا مال الحبيب وضمني بـِسْكوت
...................... صدى صوتي حفيف بمسمعه يهمس : أنا احبابك
أنا الميت على صـدرك زماني في حياة الموت
...................... أنا العايش معـك والموووت تـوه جابني وجابك
أنا دمعك عـ / سـجادة قهرنا والدموع قنوت
...................... أنا سـعدك بــ / محراب اللقـا ومرتل كتـابك
أبي يا قبرنا نصحى نعـوض عمرنا المكبوت
...................... أبي نحيـا و ثـم نرجـع نخبر مَنْ ورى بـابك
ننادي العاشقين المووت قبل انه يفوت الفوت
...................... قبل يا صاحبي العاااااشق يـدوّن عُمرك غيـابك
يجوز ان الممات أحلى تعااال وجربه به فوت
...................... وخلي دنيـتك خلفك تضج../ تنـوح../تغتابك
وش اللي تخسره لما تفارقها ( حطام بيوت )
...................... مـدامـك قِـد خذيت اللي هـواهاااا آسر لـّبابك
تعجل روحها عاشق وناديها ( تجين نموت ؟ )
...................... والا جاتك توسدها نعـش قـَفـِـّـل به اهدابك
مخرج
تجين نموت ؟
يجوز ان الممات أحلى
غريبه من الممات نخاف
أحد منا سبق مات ورجع خبّر
وش اللي في مماته شاف ؟
يجوز ان الممات أحلى
مدام إن السنين إلي
قضتنا بالحياة إعجاف
يجوز ان الممات أحلى
" بطعم الكستنا والتوت "
تجين نموت ؟
لـ الشآعر / أكرم التلاوي