[طوق الياسمين]

الف شكر كت كاته حبيبة قلبي على هذا المجهود في هذي الحلقة بالذات بصراحة ماقصرتي وكان ودي أن حلقتك موضوع مستقل عشان البنات يستفيدوا من النقاط اللي ذكرتيها لنا .. حرام تندفن داخل الصفحات وياليت تخلي هالحلقة مفتوحه كم اسبوع نتناقش فيها خبرك انا مشغولة حيل وصايرة نادر ما ادخل المنتدى .. ليتك تصيري مشرفة وياي وتساعديني
عموما .. ماشاء الله بنات الشرقية اخذوا الجو كله مدري لأن غالبية الاهالي هناك منفتحين والا لأن زوجة امير المنطقة سيدة اعمال !! اللهم لا حسد ماشاء الله .. الله يعطينا مما اعطاهم من رزق ودعم .


بالنسبة لي ينطبق علي المثل القائل " سبع صنايع والحظ ضايع " ههههههههه
خليني اقولك وش سويت وش ماسويت عشان نتناقش بهدوء

انا تخرجت من الجامعه وعلى طول سجلت بمعهد نيوهورايزن واخذت دورة حاسب آلي عجبني الحال وسويت معادلة وكملت دبلوم حاسب تربوي مع اني بهذاك الوقت عندي تشتت ذهني ماني عارفة وش ادرس لان تخصصي كان من البداية غلط فضاعت هويتي التعليمية !! ، ما اخفي عليك اني درست تصميم الازياء كمادة داخله عرض في الجامعه واخذت فيها امتياز وكنت من المبدعات في هذي المادة وهذا اللي خلى فكرة المشروع تبدأ في راسي تدور اني ادخل هالمجال واتوكل ع الله ولما قرب زواجي بعد تخرجي من المعهد قررت اصمم فستاني بنفسي وصممته وخيطته عند افخم المشاغل بالرياض وكان سمبل وبسيط جدا ومافيه تفاصيل كثيرة وكان الاستايل اروربي مثل هيك يعني ..





وتخيلي .. طبعا لأننا عرب شرقيين المجتمع يرفض مثل هذي الموديلات مايحبون البساطة ويحبون الزركشة الزائدة والتفاصيل الكثيرة ولاااااااااااااازم يكون تحت الفستان جيبون عشان يجي منفوش والا اذا ماسويتها ماعندي ذوق
وجتني صدمة من ردة فعل امي وام زوجي "الحريم الكبار لاحظي" عصبت مره ورميته بالدولاب وقلت خلاص مابي زواج قالت امي انا راح افصل لك ثاني بس يكون على ذوقي واروح وياك نختار الموديل .. طلعنا واتفقنا على فستان شرقي بنفس المواصفات العفشه عشان ينقال علي "تجملت في فستانها" .. الصراحة وقت الزفة استأجرت لي عاملتين يشيلونه لي وذيله كان مترين او زيادة ، وهذا كان أوووول تحطيم لي في مشروع تصميم الازياء


كان لي تصاميم واجده ايام الجامعه وحتى بعد التخرج وجمعتها في ملف وقبل سنة بالضبط سجلت في منتدى البطالة كان عندهم قسم متخصص عن المشاريع الصغيرة ودراسة الجدوى وادارة العمل .. جلست اطقطق هناك فترة طويلة وتعلمت اشياء حلوة استفدت منها ، وبيوم كنت اتصفح نفس المنتدى دخلت على قسم التوظيف ولقيتهم طالبين مصممات ازياء وفوتوشوب ومن هالكلام وارسلت السيفي تبعي وانهالت الاتصالات على جوال اخوي لاني وقتها كنت حاطه رقمه اغلبها شركات مختلطه ورفضت اتوظف فيها لحد ما الحت علي وحده من الشركات وكانت موظفة وقالت ضروري اعمل معك مقابلة شخصية في مقر العمل وراح اضمن لك وظيفة خارج الاختلاط ورحت لها ومعاي ملفي وتعرفنا على بعض كانت سيدة اعمال مبتدئة ..

كانت مقابلة شخصية ممتعه وعرضت عليها ملفي واعجبت بتصاميمي كانت عبارة عن تصاميم ازياء وشعارات مؤسسات وبطاقات عمل وشعارات مطاعم ومحلات تجارية .

وبعدها عرضت علي 3 وظائف :
الاولى اني اشتغل عند سيدة اعمال كبيرة وفاتحه بوتيك وتبغى مصممات ازياء .
والثانية اني اشتغل عن بعد لشركة ومايكون لي راتب مجرد كل تصميم اعمله آخذ اجره فقط
والثالثة اني اشتغل وياها هي وصحباتها ونكون مؤسسه نسائية بسيطة وفكرتها جديدة .


فكرت بالثلاث .. طبعا استبعدت الأولى لأني ماحب اشتغل عند احد وانما اشتغل مع احد اوكي او يكون لي شغل خاص
الاقتراح الثاني كانت فكرة حلوة واعتمدتها من باب شغل وقت الفراغ بشيء مفيد
والاقتراح الثالث هو اللي دخل مزاجي بقوة فكنت طماعه وقبلت بالثنتين الاخيرات .. طبعا قابلتها هذيك الفترة اكثر من مرة عشان ندرس مع بعض المشروع واتفقنا على كل شيء إلا أن اسمها كان من ضمن قائمة المقبولات في الماستر لإدارة الاعمال في جامعة الملك سعود وهي تشوف ان هذي فرصة ماتتعوض ولازم تتدرس وتحصل على الشهادة .. امممم هي حـ تكون مديرة المشروع بحكم تخصصها وانا اصير اشتغل وياها مو عندها ، فأجلنا الموضوع شوي لحد ماتخلص هي الماستر تبعها .. وياخوفي هي تخلص وانا ابدأ لأني مقدمة عليه ومادري متى القبول !
هالانسانة كان لها فضل علي لما عرفت بنات كثير علي بخصوص الازياء وكمان كانت اختها شغالة بأحد الاذاعات السعودية واجرت معي لقاء بهذا الخصوص وكانت فاتحة خير لي .



وبعد ما اجلنا الموضوع شوي جتني فكرة اني استغل وقت الفراغ هذا بشيء .. اتصلت على وحدة اعرفها تدير مشغل وطرحت عليها فكرة اني اكون مصممة ازياء في مشغلها واي تصميم اعطيها نسبة من المبلغ وما اداوم عندها بالمشغل مجرد اني اكون تحت الطلب واي وحده تبغى تصميم تتصل هي علي واحضر للمشغل وحيكون لي بزنس كارد يحمل اسم المشغل تبعها ورقم تلفونها هي وثابت مشغلها ، وافقت ورحبت بالفكرة .. الآن ماعندي مشكلة لأن على بال ماتخلص صاحبتي الماستر اكون كسبت شوية زباين من صاحبة المشغل واحول شغلي هناك مع صاحبتي ويكون شغل بشكل رسمي والمشغل يبقى يحول لي الزباين لمؤسسة المستقبل
المشكلة بسيطة في أن بداية كل مشروع يواجهه كثير من الفشل والعقبات مثل مشغل هذي البنت زباينها قليل ولسى ماله شهرة في الحي .. فالصبر والارادة والانتظار هي سلاحي لحد ما اوصل لتحقيق طموحي ان شاء الله .!



هذا بعض الشيء ولي عودة بإذن الله .!