.
.
لـ : الحزين , الذي يقف في ظلام الشارع
يعيش فقط لإيجاد العاطفة !
يا حـزين ..
يا نشيد أبكم على دفتر سنين
وانت ساري ..
ما معك غيرك , وبعض الليل , واوجاعك
وهمّك
اي .. حزين !
ومافي قلبك .. غير دِين
ودعوة أمّك !
المسا عتّم .. وشفتك في سواقي وادي الفرقا ..
على اسراب النخيل .. اللي تسيل !
شفت في وجهك أثر , وامتد بي .. خلفك
وضيّعني الثرى ,
لـ انّي نويت أتأخّرك وابقى ... ورى !
اذكر انّي قلت لك :
لامن نويت تروح بالله انتظر
اجلس على صبرك , تقهوى ..
واقعد أكتب !
أكتب انّي ..
كنت امنّي : نفسي واحساسي
بفرح
غير الفرح !
غير الكلام اللي نقوله في الكلام
وغير باكر !
خل نفسك ما انتبهت .. ورح لآخر .. !
وانشد احلامي
مقالاتي ..
قصايد قالها شاعر عصامي !
ولا اقول لك :
اقعد اكتب .. مثلي هـ الحين , وتسلّى
وانتظر .. يمكن أجيك
ولا أجيك
يمكن اكتب في هوامش صورتك هـ الحزن بيت
وما يبيك !
ولو لمحت الناس في عرض السطور ..
وصرت خايف
قل لهم بالله : شاعر
وان بدوا بـ الهمس .. واضناك الملام
قلّهم .. ضايق , وما يدري وش اللي في الخواطر
بس شاعر
لا تجازف ..
لا غفوا عنك , ابتعد .. وارمي ورى الشباك
شارع !
واعبره ..
لو ما قدرت تخضّره :
شفني , على ركن الكلام , اتأملك
وانقشك : نور !
انقشك ضدّي , وان بقى لي في تأمّل غيبتك
لو بعض ودّي
ما عليه !!
افتح ابوابك , لأمس
وانتظر في الشمس .. شمس
بيع زفراتك لصدرك .. واشتري للناس صبرك
أو ... تفقّد باقي اوراقك وحبرك
وارجع اكتب ... سالفة كتف ويدين
وجهٍ اجدب
بين بين !خلّ للطاري مطر .. وانفض مكانك .. غيم
واحلامك سفن
يا وطن محدودب القامة وعكّـازك قصيد
يا مدن ملح وترابك شاب , والوادي بعيد
يا حزين الروح , أتعبك الزمن ..
ليتك تشوف ..
وما يجي لك بال والعبرة .. تحن !
يا حزين , يا صديقي , خالي البسمة , وفي صبرك مدن !
يا مسافر من مكانك للضباب
للغياب
لـ الف من نبرات صوت الناس
والممشى / يباب !
رح .. ولا تنسى تدوّر في عيون الليل حزنك
ولو لقيته بلّغه منّي سلام
وحزن عام !
سرحان الزهراني 