[align=CENTER][tabletext="width:70%;"][cell="filter:;"]
[align=center]
دآيمن آًصحى الصبح وارتب فراشي و حط هذاك وشسمة تحت الفراش ,, وحط مخداتي القطن بطريقة
منظمة جدا ,, واعطرها بــ اجمل العطورات وشغل اللمبة الوردية وقفل الباب وطلع من غرفتي وكلي
أدب 
وشفيكم تطالعوني يعني ماقد شفتم واحد مرتب ,, بس انو الشغالة تخش من بعدي ترتب مرتن ثانية مدري
وشهو له اكتشفت بعدين اني أعفس الغرفة أكثر من أول 
ومن قوة هذاك وشسمة اني انظف حوش بيتنا وسيارة سايقنا واصفق اخواني لشفتهم يغازلون
الخدامه ويقزقزون فيها مع انها شينه .. بس وش يسوون الصنف الحريمي معدوم من
حياتهم (( يزعم انه مهوب اللي علمهم هالحركات )).. وصرت من اول ما اشوف ابوي اصبح
عليه وامسي واحب راسه وخشمه .. ولا من اول كنت امر من جنبه وانا رافع طرف ثوبي وادربك يزعم راكب حصان .. وابوي مبسوط مني ودايم يقولي عساك على هالحال واردى يعني احسن ويثبتك على عقلك والمصيبة ما يدري اني مهوب فيه وهالذرابه مهيب مني ولا انا امعصي انا اصير تسذا مالك امل
^
^
^
وشرائيكم بالمقدمة عساها ذربة بس مع اني ماقد طلعت في إذاعة المدرسة الا مرة وحدة قريت فيها قرآن
ولخبطت وش ابتدي فيه ( البسملة ) ولا ( التعويذة ) المهم من الوهقة قريت ولا قلت ولا وحدة من
الثنتين
كل اللي كتب فوق اسفطوهـ تروني اسمع بمقدمة للموضوع 
سمعتم المتنبي يوم يقول " الخيل والليل والبيداء تعرفني وذاك وذاك وذاك وذاك والقلمُ"
ومثل ما قالت ام كلثوم ياللي ظلمتو ذاك وئلتو عليه ذاك ترا العيب في ذاك وذاك وذاك
( 1 )
من يوم ماوعيت على هالدنيا وهذا هو شعوري مضطهد ومقرود لدرجة ان لحظة ولادتي الدكتور لما
شافني لاعت تسبده وتفل بوجه امي
حتى انه اول كلمه حنونه سمعتها من امي هي وعععععععع وردت تفلت
بوجه الدكتور (( من جد حسيت ان شكلي متكون في سيفون 
)).. حتى لما حطوني بالحضانه قطوني في غرفة بالحالي يحسبون فيني مرض معدي واكتبو على سريري تحمدو ربكم لا يجيكم عيال مثله
(( وش اكثر من تسذا قراده طالع للدنيا بتحطيمه ))
( 2 )
مضت السنين والايام والحال كل ماله دمار فكبرت معاناتي مع عمري وكبر خشمي مع همي وكبرت
حسرتي من حرتي واللي زاد علي اكثر يوم بلغت مرحلة المراهقه وطلعت الحبوب في وجهي وجبهتي
(( ياربي وش انا مسوي في دنيتي )).. لدرجة انه خطر في بالي اعرف انا وشلون جيت لهالدنيا
لاوقفت قدام مراية وشفت وجهي من القهر والقرف اطيح ذب بشكلي واحيان اتفل عالمرايه واقول
قدر الله وماشاء فعل اصبر فمالك الا الصبر (( العب على نفسي قلت يمكن الله يفرجها علي ويزين شكلي 
))..
الين ماوصلت الى حاله نفسيه صعبه صرت مااطيق اشوف فيها وجهي فقطعت عهد على نفسي اني اقاطعه
وابدا معه مرحلة الخصام وماعاد اسمح لنفسي ان تسول لي بشوفته .. فقمت وقشعت كل المرايات اللي بغرفتي
واذا مريت على مكان وفيه مرايات احاول قد ماقدر اني اصد عنها ومااناظر فيها واستمريت على ذا الحال شهور
وايام الين ما جا يوم صحيت من النوم مفجوع وحسيت ان وجهي يعورني (( بلا والله ذا من زود الشين اللي فيك )).. فقمت ورحت الحمام عشان في مرايه ويوم وقفت قدامها واناظر الا والله شكلي متغير ماهو مثل ماخبرته آخر مره وقلت بخاطري ايه الناس اشكالها تزيد حلاه الا انا مالت كل ماله واخيس
( 3 )
سمع صوت يقولي تخسي .. وانا من دون وعي قلت والله مايخسي الا انت شوي الا واللخم على وجهي تسنه واحد رش علي ماي بارد واقول وش السالفة تسني سمعت احد كلمني تسان اقوم وافرك عيوني واناظر حولي واناظر بالمراية مره ثانية واقول الظاهر اني متوهم مع هالوجه اللي تسنه عجوز املط الا ويتكلم وجهي من المراية ويقول وانت عاجبك شكلك اللي تسنه باب مقلط
وماوعيت الا وجهي اللي بالمراية يظهر لي وقال لاتخاف ما عرفتني ؟؟ وانا يوم شفته طالع ويقرب مني توهقت ورفعت عيوني فوق مسوي نفسي اعمى عشان يمكن يوخر عني (( يلعن ام الخوف اللي يخليك غبي )).. وقلت له وشلون اعرفك هو انت انس ولا جن .. قال لا جن .. وانا ليما الحين ماشي بدور الاعمى وقلت اشوى والنعم فيك والله لو انك انس تسان لعنة ابوجدك .. قال اعرفك بنفسي انا شوشو .. قلت وش شوشو ذي رقاصة بدبي ولا شو .. قال ماتنفع ذب زي الناس ولا انطم انت وهالخشم اللي تسنه فخذ .. قلت اقول روقنا انت ووجهك اللي تسنه عرس مافيه احد .. قال ياخوي وراك زهقان ومتكدر وضايق خلقك ؟؟ قلت يااخي وشلون مااتكدر وانا شايف وجهك (( يووهـ انفضحنا 
))..قال اجل اعمى خخخ بس بعذرك منقهر عشاني مو شين مثلك
ناظرته ورديت عليه مع موسيقى حزينه وقلت هذاك قلتها شين وشلون ماتبيني انقهر وانا مكتوب على وجهي قهر وزهق .. كله هم .. وحزن .. وضيقه .. وقلق
( 4 )
صرت أشتكي للجني تبعي من يوم ماولدت الى ماوصلنا عند المراية
قلت له اللي مضايقني هو اني ماعرف بنات ودي اتعرف على بنت قبل مااموت
(( ياشين القراوه مايعرفون يتمنون .. لو متمني يصير حلو تنبلع بس يتعرف على بنت بهالشكل مستحيل ))..
قال ياخي وش هالامنيةالصعبه خصوصن ان وجهك مثل ماقلت ما يساعد بس ماطلبت الا رخيص وتراها
عند خشمك .. قلت وشي الليعند خشمي ..
قال يعني انا بضبط وضعك واعرفك على بنات .. قلت روقنا بس .. قال ليه وش جاك ؟؟
قلت وشلون يالنصاب بتضبط وضعي وانت وجهك تسنه وجه قرد معه امساك .. قال يا درج انا من الجن واقدر
اتشكل بأي شكل ابيه .. تسان اقوم واقرب منه واعطيه نظرة خبيثه 
واقوله اجل تقدر تاخذ شكل
بنت الحين (( الحين منهو ابليس فيكم انت ولا هو )).. قال على تبن ياحمار وقم معاي عشان
اعلمك وش تسوي يالشين (( نعن ابو من جمعكم يالحمير 
))..
^
^
^
ترون اللي قلته فوق والله انه حلم تحلمته وكتبته أحد عنده تفسير لــ هالحلم
لايكون مثلا اني بصير شين مثــلأا
ترون ماصحيت الا أمي تصحيني ونا فكرها الجني اللي في الحلم وقز فيها اقول وخر
عني ياشوشو مانيب بفاضي لك ,, فما كان مني غير اني قمت ادغدغه في بطنه واقول له وش فيك ماتضحك يالخبل (( باقي ماسك فيني الحلم )).. وما كان من ميمتي الا ولختني بهذاك الكف على وجهي خلتني
الف مكاني سبع لفات احداهن بالتراب وانا افتر راسي ودارت الدنيا فيني
عساكم فهمتوا شيء ,, يالله ياشوشو انك تجي اليوم ابي اشوف وش بتسويلي
مع البنات 
ملف ضايـــع - حلم لم يكتمل
[/align][/cell][/tabletext][/align]