[عيوني لك]

بسم الله الرحمن الرحيم
السلام عليكم ورحمة الله وبركاته

((مات الخروف والضحبه السفان ))

هذي قصه من القصص الواقعيه واللي صارت لمحاكيكم بالذات بعني ماهو نقل عن فلان والا علان واسمحولي ان اوردها لكم بطبيعتها لغة ونسجاً..... واتمنى ان تعجبكم وتنال على رضاكم وتحوز على استحسانكم
(( في يوم من الايام صرحنا بالغنم انا واثنين من رفاقتيه اللي معي من ايام الطفوله واحد اسمه . ع . والثاني اسمه أ. امهم صرحنا في وادي اسمه حزم وقريب منه محل اسمه العمياء ذات انهار تجري وبساتين غناء السالفه هذي قبل حوالي 15 سنه تقل اوتزيد . المهم وصلنا العمياء ومعنا برادي وتحليه وقراشاً من عهد العشاء البارح وبسكوت ابو قشطه اسمه (هلا) ابو قرطاس احمر وابيض المهم يوم وصلنا هناك جلسنا وقام الاخ.أ وهو المختص في الشاهي يزبط البراد وسوى المشب وزبطه وقمنا انا والاخ .ع نولف الحطب وصلح المختص الشاهي وقعدنا نتقهوى ونتهرج ونحش في المدرسين والطلاب وتناولنا اطراف الحديث في الجماعه وكعادة الرعيان مايبقون لاشاره ولا وارده.والمهم وحنا نسولف شويه والا ماتسمع الا مطاحنه ومناطحه بين الخرفان الخروف حقنا الاكحل وخروفاً معهم ابو قرون ويوم شفتهم قلت ابوك يالولد وتحفشت وقلت بنزل افرع بينهم وقالو الشباب بالله خلهم دخيلك خلنا نتلمح فيهم . شويه وقفو الخرفان وكل خروف راح لوحده وعودنا قعدنا نسولف ونتهرج الين قربت تغرب والله ونشرنا الغنم طول المضاحي عشان نروحها الصندقه . وفي وسط الطرق طاح الخروف ابو قرون وجينا نشيله وندفه ونحاول فيه ونحاول فيه عشان يروح مع الغنم وابا يتحرك . والا ياولد الدنيا اغربت والخروف اب يقوم والله وقلت للشباب ياشباب الوضع ماهو طيب الدنيا اغربت والخروف معينه يقوم خلونا نروح ونقول انه ضاع والا نقول ماندري عنه
والا ورفاقتيه يقدمون ويوخرون ودهم وما ودهم وفي الاخير اقتنعو وراحو معيه للقريه . المهم كلا منا راح البيت وشوية يارجال والاوشي قابعاً يقبع في الباب وقام الشيبه وفتح والا وهو ابو السفان راعي الخروف وعلم الشيبه وقال الورعان ضيعو الخروف وخلك ذياعك الغله يخرج يدور له معهم قال الشيبه ابشر وقام يزهمن ويوم قربت منه قال(( بسم الله عليك بالرحمن الرحيم )) ويصكني بهذاك الكف اللي من جد يدوخ اخلف التقسيمه مزبوط وعلى شوية قراميع على الصلعه وعلى طرده مع الباب ورتحه من اللي يحبها قلبك وقال ايه انت واياه فاني مثل امكم ان جيتم بغير الخروف . طبعا هذا شي ما احد يقدر يراجع فيه وياويل واحد يراجع فيه .وصرحنا بليلنا عند الخروف وجينا والا وهو تفل العافيه وانتشقها وحرجا منتهي . واشتلناه ورحنا به بين ايدينا بس ياولد ما وصلنا به القريه الا وظهورنا بتتكسر تخيل خروف وميت وحنا باقي جهله واعمارنا باعمار الزهوووووووور .
المهم دعيت الشيبه وشافه وقال وش معه قلنا والله تناطح هو الخروف الاكحل وذبحه . قال لاوالله انكم حذفتموه بالحجاره الين مات وعودتم تقولون الخروف نطحه وقام علينا بغاره جويه وهجوم عنيف من نوعه وختمها بالطرد المؤقت والنوم في الوادي وسرى علينا ياولد ليلا ماسرى على مسلم..........))
هذا مانعلمكم به وزيد عفاكم
اتمنى ان تكون القصه اعجبتكم وسامحونا ياجماعة الربع على الاخطاء الأملائيه