السلام عليكم
مافي وقت للبربسه
المهم .. كنت انا والغالية زميلتنا روعة عالمسن ندردش ونتبادل امور العباد والبلاد
وخلصنا سوالف وكذا .. قالت لي كم يوم احاول انزل موضوع لي بالطبخ لكن مارضى ينزل
يختفي موضوعي وقروشة ماهيب زينة .. فااا ممكن تنزلينه لي ؟
قلت لها انزله وانزل والدينه
.. وارسلت لي الصور عالإيميل وضبطته وهالحين ركزوا معي
بجبنتها ولبنتها وخبزها
هالبنت شاطره وقولوا ماشاء الله
طبعا سألتها .. هل عندك بقرة يومنك تسوين هالحاجات ؟
قالت لأ .. ان في واحد يجيب لهم لبن طازج وتسوي منه هالشغلات القميلة
أولا : الجبنة
المقادير ..
لبن طازج وملح وليمون وخل ابيض وكميته على حسب عدد افراد العائلة وينخلطون مع بعض
الطريقة ..
نحط اللبن عالنار ونشغل النار ونخليها هااادية لمدة ساعة الى ساعة ونص بدون مايوصل لمرحلة الطبخ
مع المراقبة .. يعني انتبهي له
إذا بدى مرحلة الطبخ راح نلاحظ على اللبن انو يتجمع بنص القدر مثل القرص الابيض يسبح على مويه
هذا على حد تعبير الاخت روعة والعهدة عليها
هنا عاد نطفي النار ونتركه شويات لحد مايبرد
بعد مابرد حطت الشي اللي كنه قرص ابيض بشاش او قماش مشخـّل ..
تقول عادي لو تحطين غترة رجال بس مب معطره خخ
ثم ربطته وعلقته بالكرسي مثل ماهو موضح بالصورة عشان تنزل بقية المويه ياللي بالجبنة
ومدة التعليق وهو مربوط من 3 : 5 ساعات
وبعدين تنشال وتنحط بصحن
وانتي حرة في تشكيلها اما كور او بعلبة وتتزين بالحبة السوداء وينحط عليها زيت زيتون
مثل هاي الصورة
نجي الحين للبنة
تقول روعة انها نفس طريقة الجبنة الا أن الاختلاف في عدد ساعات تعليق الشاش بالكرسي
يعني نخلي عدد الساعات اقل عشان ماتنشف وتصير لبنة واتوقع اننا نقلل الخل والليمون والملح
لان غالبا اللبنة اقل لذعة عاللسان من الجبنة
والحين الخبز
المقادير :
4 كاسات دقيق منخول
ملعقة كبيرة خميرة فورية
ملعقتين سكر
رشة ملح
الطريقة :
تعمل بوسط الدقيق حفرة
ويوضع بها السكر والخميرة والملح وشوية ماء دافئ
ونتركها خمس دقائق الى أن يبدو عليها رغوة
ثم نبدأ بالعجن الى أن تصبح هكذا
ثم نبدأ بتشكيل كور صغيرة بهذا الشكل ونتركها خمس دقائق
ثم نبدأ بفرد الكور بالفراده
حتى تصير بهذا الشكل
ثم يخبز على الطاوة وليس بالفرن .. بهذا الشكل
والنتيجة .. خبز لذيذ صحيح ماذقته بس شكله يشهي
وبالنهاية
لا تنسون تغمسون الخبز باللبنة والجبنة .. ويا عساه فطور الهناء
ملاحظه /
الصور والطريقة والمقادير وكل ابو شي من إعداد "روعة"
وانا مجرد كاتبه للموضوع وحافظه لحقوقها بالفوتوشوب نظرا ً لظروفها الكمبيوترية
يعني لا تجيني بكرا وحده مطفية النور وتقول زيني لي طبقي بالقسم
ثم ازعل عاد تراي تعبت >>
وسلامتكم