[بدر كنانه]

[align=center]
بسم الله الرحمن الرحيم000



0000000000((أنا أطهر شي ماعملته في حياتي يوم حبيته))0000000000

صحيح إنا تفارقنا وكل ٍ راح في حاله
ولكن كان للتقدير موقف ماتناسيته

أنا قدّرت وضعه والفراق إشتد زلزاله
ووصاني على الصمت وعلى التفكير وصيته

وسامحته على اللي قال وعلى اللي مابعد قاله
وعلى راحة ضميره والقرار الصعب خليته

وبديت أرقب خبايا خلوته بدموع هماله
وتحريته على نار ٍ وليتي ماتحريته

صدمني بالفراق وسرعته في ردة أفعاله
وثبت بي خيال ٍ ماسعى الواقع بتثبيته

وبعد ما كان أقرب لي من الرجال لظلاله
بعد ما كان يضحك لو قسى قلبي وبكيته

بعد ما كان قاهر كل عذالي وعذاله
بعد ما كان يتفرث سحابي كل ما جيته

بعد ما كان يعشق من رجاحة عقلي هباله
بعد ما كان سيد قلعة الشعر وعفاريته

بعد وش عاد باقي يا بعد يا كود مواله
وإذا جره وأنا غافل وقرب لي وضميته

أنا وشلون أصدق بالفراق وبارق خياله
وأنا قبل أمس .. لالا أمس .. لالا اليوم في بيته

وش اللي صار يا ربي ؟ وش اللي غير أحواله؟
وش اللي يجبره يصد عني يوم ناديته

قسى / وإلا نسى / وإلا عسى ما مر في باله
فراقي وإعتبر ما صار ممسك صعب تفويته

عجب !! يا وقت كيف حظوظنا بالوقت مياله
وأنا مافيه شي ٍ ما يسوى إلا وسويته

غدى راسي هدف نقص الزمان وخمة رجاله
وأنا راسي عزيز وعن سقاط الحكي عزيته

وعزيت الحبيب اللي ضوى لقلبي على جاله
وشلت القلب في كفين مرضاته وحطيته

وأنا ماني ولد عمه ولا حتى ولد خاله
ولكن دون إبن عمي وإبن خالي تعزويته

ولكن راح وأبقاني على صدر الحزن عاله
ولزمني خطاي اللي عليّه دين ما اخطيته

إذا هو شايف ٍ حبه إضافة ذنب لأعماله
أنا اطهر ما عملته في حياتي يوم حبيته

عزاي إني على حق وعزاي إنه على فاله
وعزاي إني على صدق الغلا والشوق خاويته

ولو حنا تفارقنا وكل ٍ راح في حاله
أبأستناه لين الموت توقف بي مواقيته

000000000 مطلق النومسي [/align]