الشهادة في كتابة العدل
بالأمس رحت أخلص شغلة في كتابة العدل وطلبوا مني شاهدين
قمت طلعت جوالي ودقيت على ستين واحد من اصحابي كلهم ما يردون ( راقدين / الناس في صيفية)
المهم قعدت محتاس ... مدري وش أسوي ومن فين أجيب شهود ذالحزة ... شويه إلا واحد يقولي يا ابو الشباب تشهد لي وأشهد لك
التفت فيه وقلت ... كيف ؟؟
قال أنت وش موضوعك .. قلت : وكالة ... قال بسيط انا بشهد لك وبنشوف لنا ابن حلال ثاني وتنهتي الشغلة
قلت براسك .. شويه الا واحد داخل مطفي النور قلنا له - بفم واحد - تشهد معنا !! ارتبك الرجال وقال أشـــهد وأنا أبو فلان بس على ايش بصوت واطي ؟؟ قلنا له السالفة .. قال من عيوني
وهاتك يا مطاردة بين كتّاب العدل ... من مكتب إلى الثاني بأوراقنا الصفراء .. وقوة تواقيع .. وفي نص ساعة خلصنا مهامنا وخرجنا نتنفس الصعداء خارج الإدارة ... قام قلي الشاهد الأول إلأ أنت وش موضوع ؟؟
وقتها ما قدرت أمسك نفسي .. ودخلت في نوبة من الضحك ...وهو يضحك من ضحكي ... وبعدما خلصت ... قال وش فيك تضحك ..قلت : يا خوي
الحين حضرتك من عشر دقايق بس صاك ذاك التوقيع اللي يجي شبرين على دفتر الضبط وشهدت شهادة تقص الرقبة وجاي الحين تقول وش الموضوع .
ابتسم وحس إنه مضيع وقال خلها على الله يا بن عمي
ودعته وودعني وكل واحد رايح في طريق وانا أقوله وش اسم أمك ... وهو يقول :فاطمة فاطمة ..... فاطمة هذي هي أمه اللي سوت الوكالة له وأنا الشاهد
لا تشل هم الوكالة بعد اليوم
أكيد بتلاقي من يشهد لك .. لكن الله يعينك تشهد له
يداً بيد
