[غربة مشاعر]

كعادتي الميمونه ايام الصبا المليح..
رجعت من المدرسة ولكي انهي قصه الواجبات بدري
اختار ثلاث حلول
الاول اما اني احلها بالمدرسه غشا صريحا جهارا نهارا
او اذهب لاحضار دفتر صقيقتي بعد حلها وهذا الاكثر
او اعصر بنيات افكاري وعاده ماتكون رونق برونق والهديه تكفيخ من الابله السوريه ..
جيت هذاك اليوم ومعي واجب بالجغرافيا
المهم كان الواجب عن جبال كلمنجارو بافريقيا
المهم واجيكم واتخيل هذاك الجبل الصميدح قبالي وارسمه نقش حنا
وش عرفني انا بكلمنجارو وش عرف اهلي به
المهم يا اني رسمته رسمه الله واكبر
واسرح اليوم الثاني المدرسه وتجي هذيك الابله وتصكني كف قسم ضيعت ملامح اللي تجلس جنبي حسبتها سعلية
واصيح هذيك الصيحه اللي تشبه وامعتصماه جدي سمعها وهو بالبلاد
المهم سخنت ووجهي انتفخ وخرصي طاح من اذني من هول الضربة
وارجع البيت وكل همي اني ارى جدتي لاحكي لها الحال لعلها تبرد قلبي بشيء مما في جعبتها
وازود معيار البكيه حبتين وفرك اذني ليتساقط القليل من الدم ليكون الشاهد على الواقعه
وارتمي باحضانها ياعل عضامها الجنة
واسرد لها السالفه
وهي تقول وانتي معك بصيرة ترسمين كل من جا؟؟هي على بالها كلمنجو
قلت وش تبيني اسوي وفوق هذا ضربتني ياجد
والله ومن البكرة ومن الصبح وجدتي متحزبه
وين ياجده قالت بروح معك المدرسه
اعاد انا اعرف روحاتها لازم يسيل دم
وامشي بكل فخر واعتزاز وكأني نابليون بونابورت
وندخل المدرسه وهي واقفه معي قالت وين هي اللي ضربتك
قلت ذيك ؟؟
قالت هذيك الحمرا؟؟
قلت ايه
وتمشي بكل هدوء وتقرب منها
وتطلع من تحت الصدرة مفت العجين
قسم لو تضرب به جمل ليغادر تهامة بلا عوده
وتصن به السوريه بين مفارق راسها وتصيح هذيك الصيحه اللي سمعها قال مقروصه
وتطيح مفرشه تقول حاملة طايرات
ويضحكن كل البنات
وتسحب جدتي جميع قواتها وتغادر المدرسة وبدون اي كلمة
حتى المديرة السودانية بدرية لم تقدر على الكلام
ومع العصر واذا بالمديرو وزوجها ووفد جايين ومعهم السورية ورجلها اللي يصلح الطعمية
ويجون لجدي وتجيهم جدتي وبيدها مفت العجين
قال قسم بالله يام الشبط لو لمستي البنت لادهنك بذا المفت
البنت مامعها بصيره ترسم لك كل من جا
وانا على يقين ان جميع الوفد لم يفهم القصد
وكان لذلك الجبل كلمنجارو السبب بعد الله بنجاحي بالجغرافيا
وانا على يقين لو رسمت خريطه السودان بدل المللكه لتعطيني صح
والسبب نفت العجين

فرحمك الله ياجدتي
ويذكرك بالخير ياكلمنجارو
المشاكسة/غربة مشاعر