محاورة بيني وبين أخي الشاعر القدير محمد عيضه
البدع مني والرد منه
أمل أن تنال رضاكم وإستحسانكم
... البدع :خالد رجب
ياالشيخ ابو ثامر ظلام الشك يكشفه اليقين
والصمت لو طالت به الايام يفضحه الكلام
ترى الجروح قصاص سن ابسنه وعين بعين
واللي يهاب الحرب يتعلم قوانين السلام
الرد :محمد عيضة
هلا وسهلا فيك يانسل الكرام الطيبين
والحب قبل الحرب في الترتيب لكن ماتلام
تخلّع انياب الاسد بيديك ياذرب اليمين
من شان لما يبتسم لك ماتهاب الابتسام..!
البدع:خالد رجب
ياخوي ماابغى منك خطبه كل ابوها كلمتين
والا تبي تخلع ثياب الشعر وتعوّد امام
علمني الله لايهينك لاتسوي لي كمين
ويش الذي خلاك تدخل في الحلال وفي الحرام
الرد:محمد عيضة
أنا وش اعمل لا لقيت المارقين المفسدين
لو قلت لي وضعك تمام اقول لكم ماهو تمام
اخاف ربي يمتحنا بالجراد وبالسنين
وانته ورا يوسف خميس وعن قفا عادل امام..!
البدع:خالد رجب
اللي عطاك البندقة والسيف والرمح السنين
فرش لك الرمضا وهو قاعد على ريش النعام
وش قرب الجوفا من الحوزات في قم اللعين
انا اشهد ان بني حسن ياصاحبي خير الانام..!
الرد: محمد عيضة
اللي وهبنيها محمد سيد الخلق اجمعين
ماهي عطيه من ملك والا نهيبة من غلام
نزع الخرافة من قلوب الناس ياعبدالمعين
اشد من طحن الحصى واشد من نزع السهام
البدع خالد رجب
اخاف يكسونك عمامة وانت رجال فطين
عمامة الماخوذ تاجي بالصداع وبالزكام
اسمع كلام اخوك والا سد عنه اذنك بطين
ولايجي منكم خصام ولايجي منا خصام
الرد: محمد عيضة
راس المفكر مابتصلح له عمامة صفقتين
يبغى يظلّي حر حتى في الشموس وفي الزحام
واخوي طيب بس عذروبه مراوغ حبتين
لوما يشوف العسكري موجود ماشد الحزام..!
البدع خالد رجب
لفيت حولك لفة ولفيت حولك لفتين
ولالقيتك صاحي ولاجيت وانت من النيام
ذكرتني بالذيب يفتح عين ويغمّض بعين
يضحك على الراعي ويشبع في الغنم لحم وعظام
الرد محمد عيضة
فهمت متأخر وانا خابرك رجال ذهين
لفّيت حتى طحت مابين الدوارج والسهام
آثار بعض الجعجعة تجيب فالآخر طحين
مثيل ماالعرجا تجيب احيان ساقين النعام
البدع خالد رجب
فهمت قبل آفهّمك لكن عاد الله يعين
رميتني بالسهم وآنا كنت ابي منك الوسام
رح يسعدك ربي وياجعلك من اصحاب اليمين
مثلك ولو جا منه زله ودي انه مايضام
الرد محمد عيضه
ضحكتني وانا لو اضحك صرت ماكني بعين
طقييت راسي وارتغيت وقلت ذا مسك الختام
يالموذي اللي تدعي المولى يعين المستحين
الله حسيبك كم تذر الملح فوجوه الحشام ...!