البلد ....
ياكثر مافيها من أحزان
و السهر سلوى حيارى ...
و العذاب انسان
إشرقي من عتمة الظلما وكوني ..
صبح يرتاح بعيوني ...
و شمس ريانه حنان
وعلميني أبجديات الهروب ..
من الغروب ولحظة الفقدان آه ..
يا صعب هذا الزمان !!
وين أولّي ..؟؟
جيت ألوذ بنور وجهك ..
من عبوس أهل الزمان !
جيت أقول إني تعبت من السفر بين الصور ..
وإني ضجرت من الضجر ومعانق الجدران ..
وجيت أقول إني هزمني البرد ...
وإن الوجد كايد ، والأمل خوان !
وجيت أقدم لك قصايد ورد ..
لكن نصفها حزنه يفوح !
ونصفها ذبلان !!
جيت أبا انسى ...
صدقيني ، مابقى فيني جلد ومحدٍ من الهم خالي
وكل خالي ماخلا من هـ النكد !
والبلد / ياكثر مافيها من أحزان ..
اقصري صوت ( المسجل ) ..
سكّتيه .. اللي قضى عمره يدجل ضحكتك !
ياني شغوف لجلجلتها ... جلجليها ..
واتركي الدنيا تجلل ..
واعزمي الفرحة وخلّيها تعجل بالوصول !
الأغاني ،,
كذبة إنسان يعاني وشي ثاني ..
لا تنظنيها مواني ..
ولا تعديها ولا ربع الحلول !
والطرب إنتي طرب كلك دخيلك موجي ظلك ..
وقولي كيف أفلك ؟
وإن جمعتك ..
علميني وش أقول ؟
تلمذيني ..
لعنة ( الأستاذ ) من حولي طفت ضوي ...
وتوي بأول فصول التأمل والذهول !
والخطاوي في حذر !!
تنسل بي وسط اندهاشي والعقل مشلول !
يادليل اللي غدى منه الدليل..
إقهري هـ المستحيل..
وانفضي عن كاهلي حمل المسافة ..
ولا تخليني كذا ... مثل الذليل
وكوني في قلبي حنان ..
طالبك / لا تتركيني في مهب الحزن وأوجاع الزمان ..
إغسليني من غثا الأيام بشويّة وفا ..
ودوّري لي في ظروفك عن مكان ...
وعن أمان .. وغيّبيني في تضاريس المشاعر
في مناخات الجسد ..!
لو دقايق تحسبيها ، أو ثواني بالعدد ...
وبعدها مابي أحد ....
غيرك ولا غيرك أحبه للأبد .....
والبلد / ياكثر مافيها من أحزان .!
لـ / صالح الشادي