[الفقير الي ربه]

يالله تفرجها على كل محتاج
يامن سجى نور الدجى وانبلاجه

ياخالق الانسان من نطفه امشاج
يامقدر احزانه ومنك ابتهاجه

من كل شي سويت زوجين منهاج
من الشجر حتى الحجر والزجاجه

اسرار علمك دونها العقل ينعاج
يتضائل التفكير وقت انفراجه

ياخالقي عبدك تحدنه اسياج
والوقت من حوله موثق لحاجه

واهل الزمن ماعد بهم مضوي اسراج
كلٌ على ربعه مقطب حجاجه

مافيهم الا كل شامت ومهراج
وقت النوايب مايفيدك بحاجه

يعجبك في وقت الرخاء بالتغناج
وان قدر الله طار كنه عجاجه

يغيب عن عينك ليا احتجت بفجاج
ينسى معاريفك ولو كنت تاجه

ماني بنادم غير في قلبي احراج
على المشاهد لو تعكر مزاجه

الرازق الله ماهم اهل التبهراج
والا الزمان اليوم ماكثر هماجه

يارب مالي غير فضلك والافراج
ياواهب الرحمات حتى الخواجه

ارفق بنا ياخالقي بين الامواج
يارب هذا الوقت بان اعوجاجه

الأرض ملكك والسماء ذات الابراج
والكون سبح لك وتسجد فجاجه
=================
كلمات ألشاعر فلاح منشار