(( جمـر المحبـه )) ..
ـــــــــــــــــــــــــــــــــــــ
شمـوع وحـبـر واقــلام واوراق
واربع دموع وهمس واربـع زوايـا
حالة من النفسية وضيـق الاخـلاق
وامعـان فكـر وبعثـرة فالخفـايـا
كشف غموض النافذة بـرق الآفـاق
والريح سوت فـي الستايـر سوايـا
قامت تهادى وانكشف عنّهـا السـاق
واسترسلت حـب وحنـان وسجايـا
لين اطلعت شحنة من اعماق الاعماق
تحشرجـت بيـن الضلـوع الحنايـا
كتمتها لين ارهقـت قلبـي ارهـاق
واليوم فاضت من ضلوعـي سرايـا
صور من الماضي بها خاطري ضاق
كانت لهـا شاشـات عينـي مرايـا
مرت علي مـرور مبعـد ومشتـاق
وامعنـت فيهـا الا سجـل الخطايـا
ابكي من ايـامٍ بهـا هجـر وفـراق
واضحـك مـن ايـامٍ كثيـرة مزايـا
واوقف لرسم الحب في ساعة اشراق
واسترجع البـوم الصـور والهدايـا
عاشق ولاغيري على الارض عشاق
اعطي ولا اطلب من وليفـي عطايـا
بينه وبينه عهـد صـادق وميثـاق
مالـي شعـار الا بيـاض النـوايـا
ادمـح خطـاه وللمعاريـف سبـاق
وان ضاق رحـت ابـادره بالتحايـا
واللي حصل نصيب ماعـده اخفـاق
لـو كـان حملنـي حمـول الزرايـا
كم من سنه مسدل على الماضي رواق
وانـا جروحـي منـه ماهـي برايـا
لكـن ذكرنـي بهـا نـوض بـراق
اليـا بـرق ذكـرت هـاك الثنـايـا
ماهو بانا أول عاشقٍ حظـه انعـاق
وآخر ضحية فيـه غيـري ضحايـا
جمر المحبـة لـو دفنتـه بالاعمـاق
لابـد يبقـى مـن وميضـه بقـايـا