[عبدالله بن زنان]

.
.

.



ناض برق المشاعر والمشاعر تمون
وأمطر القلب ما همّه ومايحمله ..

الحزن والفرح مابينهم جيت لون ..
لجل اشكّل شموخ العزّ وآظلله ..

البيارق رضا وعصيّها ماتهون ..
والتواريخ تتسجل على المهزله ..

راح أبو سيف والتاريخ لجله يصون ..
سجل اسمه شهيد وبالدما سجله ..

مات مرفوع راس وكل راسه شطون ..
حرّ والحرّ من يعرفه مايجهله ..

كان يمسك زمام الصبر وايده مزون ..
كان يعطي وكانت بسمته أجمله ..

كل موقف شهد له والمراجل تخون..
وبيت مثل السلامي مانقص مرجله ..

هم كرام اللحى والعرف فيهم ركون ..
والكرم عندهم منبعه من أوله ..

افتخر يوم محويه بهم يعتزون ..
وافتخر دام زهران اعتلو منزله ..

نفتخر فيك ونعزي قلوب ولحون ..
لأن مثلك أسد والفقد من يقبله ..؟

رحت للشام لبيت الندا والطعون ..
رحت بالعلم ورصاصك له الزلزله ..

رحت وافي لدين وعرض فيه الحزون
رحت مثل الهبوب العاصفه للوله ..

رحت علمت نشء الشام معنى المتون
يوم تحمل جبال الشيمه المعضله ..

رحت سيلٍ تميز باقتحام الحصون
وكنت أوفى شجاع وكان لك جلجله ..

كنت نسمة عبير وطير فوق الغصون ..
كنت تكتب بجهدك شي ما أنبله ..

كل الأحرار بعدك غصب يتألمون..
وكل حرٍّ بما يفعله ويجمله..

أنت عنوان للأمجاد واللي يجون..
وانت فخر القبيله والعطا سلسله ..

كل زهران تفخر بك ودمع العيون
لو نزل للفراق .. الحق ما نسفله

القدر حلّ وأجمل خاتمة لك تكون ..
والشهادة هي الأعظم من المنزله ..

يقصر الحرف ياعثمان والحرف دون ..
كيف يرقا لمن روحه أبت تخذله ..

العزا فيك خنجر والليالي سجون ..
والفرح لك بداية جرح ما أكمله ..

المهازل كثيره والهدايا جفون ..
وشمس الأحرار لو غابت تجي مقبله..

عزتي للصدى والصوت قبل السكون ..
كل الأوطان صرخة والبكا نعضله..

ياشبيه الغمام النزف فيني جنون ..
والعطايا رزايا والحزن باكفله ..

ياشهيد الرجوله والقيّم والدخون ..
يالجسور الشجاع الظلم من يقتله ..

رحت واهديتنا شمسك وجمر الغبون..
وليتنا نفهم المعنى ومن يهمله ..

التساؤل مداين والإجابات عون ..
والله أكبر من اللي فتّوا الحنظله ..

ياشهيد المبادي لك سلامٍ فتون..
ياسمينه مع الريحان يتخلله ..

أعذر الروح لو يقصر سلام المنون ..
وأعذر القلب في حزنه ولا تعذله ..

أطلب الله يجمعنا بجنه تكون ..
خاتمة خير وأعلى شي بالمنزله ..!!





.
.

.

عبدالله بن زنان ،،،