[الشغموم]

هذي القصيدة كتبتها و انا بالهند

عزّي لمن سافر على شان يرتاح
من هم وقته و الجروح الدفينه

واثر السفر ما جاب له خير يا صاح
بيّح عزا قلبه و هيّض حنينه

أنا السجين اللي تولته الاتراح
وانا القتيل اللي حياته ضنينه

وانا الظمان التايه أف بر ضحضاح
يتبع سراب الال محد ٍ يعينه

وانا الأديم اللي بغا غيم قدّاح
ما جا على يساره ولا جا يمينه

يا عيشة الوحدة لك سيوف وارماح
لك طعنة ن وسط الحنايا مكينة

واجرحي اللي دب الايام ما راح
ما ظنتي ساعة وفاتي تحينه

لا من ذكرت الزين جاوبت الاصداح
حتى الحشا يمديك تسمع ونينه

ولد الغزال اللي رعى سيح وابطاح
أدعج غنج معزول صافي جبينه

في مبسمه عطر ٍ من الورد فواح
انوج من اليشموم و الياسمينه

وفي نظرته عشق ٍ على الغير ما باح
طال وتِغطّا بالورق في كنينه

يا تل قلبي تل قبّاض الارواح
او تل دلو ٍ بالرشا ساحبينه

لو حل مابي في طويل الجبل طاح
وادوى بصوت ٍ كلكم سامعينه

ما فاد مع قلبي مواعيظ وانصاح
ما تاب في مكة ولا في المدينة

راسه يبس لمطاوع الشور شحّاح
عجزت أردّه والهمه بالسكينه

و مْن الغثا دمعي على الخد نظّاح
غرقان بدموع العيون الحزينة

بحر الهوى يطميك لو كنت سبّاح
حذراك لا تضحك و لا تستهينه

يا ما جرف قبلي طحاحيح واصحاح
في غبة ٍ ما قاومتها سفينة

يا بنت أنا قدمي ثمانين مشواح
محتار فيهن و الدقايق ثمينه

و يا بنت انا كالطير مكسور لجناح
مْن الظنا والحال ما تجهلينه

فان عشت لي شعرٍ تسطّر بالاصفاح
وان مت دمع العين لا تسكبينه

و الذكريات فـ حندس الليل مصباح
لو تشعلينه ما تنام المدينة ,,,,,