[نسيم السروات]

قطع الله قلبيه عنه.
وصرم الله حاليه عن حاله.
ويا هجّ ما جوف بطنيه عن ذيوك الضعيف
_________________________

عبارات أضحكتني كثير والأخيرة موت هههههه

الله يسعدها من كهلة ذكرتني بأمهاتنا وجداتنا الله يسعدهم .

من طرائف زمان المصارعة الحرة أذكر زمان كنا معزومين عند جيرانن لنا من أهل الجنوب لكن مو زهارين .

فتعشوا الرجال في المقلط وقاموا للمجلس وجاء دور الحريم يتعشون بعدهم وكان

يوجد في المقلط تليفزيون وفيه برنامج المصارعة بدأ مع بداية عشاء الحريم .

وكان فيه عجوز دوبها جاية من الديرة عند ولدها اللي هو صاحب العشاء وكانت الكهلة ماتبي تعشى

ماغير تلوى فوق رؤوس الحريم وهم يتعشون وفجئة جت عينها على الشاشة وشافت واحد من المصارعين

أخذ الأخر وشاااااله حتى وصل السقف وهبد به على الأرض وبرك فوقه يدبغ فيه هنا الكهلة جن جنونها

وفتحت الباب على الرجال وقامت تصيح أفزعوا يارجاجيل أفزعوا ياهبان الريح الرجال ذبح الرجال

بصوتها كله والرجاجيل من الخرعة دخلوا فوق الحريم ما يدرون وش السالفة وتعلى صراخ الحريم وكل

واحدة قامت تدرق في الأخرى واللي مشت من فوق صحن الرز وطغت برجلها وسطه وأحرقها واللي

تدهف في رفيقتها وتقول وخري من طريقي تبي تدخل جوة البيت ،

المهم صارت ليلة ما تنسى وبعدها ضحك ما قد جرى مثله من الحريم والرجال .

الله يوسع صدرها ذيك الكهلة كلما ضاق صدري تذكرت موقفها هذا وضحكت من قلبي .

جزاك الله كل خير أخي الحصن على هذه المواضيع التي توسع الصدر وتشرح الخاطر

عن سيرة الطيبين وأرواحهم الطاهرة .

ننتظر المزيد بارك الله فيك .