[عبدالله الحديبي]

يا بحر ياللي قبل كم عام مريته
شاطيه شاطيه و امواجه هي امواجه

ماشي تغير سوى شاعر على صيته
قصايده بين خلق الله وهاجه

والفضل لله ما من شي سويته
ربٍ قديرٍ بسجن العبد وافراجه

اذا تعسر علي الامر ناجيته
ياللي تريد العفو والمغفرة ناجه

اقصى الطموحات عفوٌ منه ياليته
ورضى امي وابوي والا الناس لجاجه

والناس م تعامل ابنادم بماهيْته
واعزتي للفقير اللي على الصاجه

حسيبك الله ياذا الفقر خليته
ماله مع الناس لا صحبه ولا مواجه

لو لي على الفقر حيلة كان ذكيته
ولاشوف بعض الحبايب يشتكي الحاجه

يالله ياللي تحج الناس لابيته
ويجود بالمغفرة لذنوب حجاجه

تعين راع الكرم والناس ناصيْته
بابه مشرع لهم ما صك مزلاجه

لا جاه صاحبه يشكي من تناهيته
ما راح من عنده الا مطلق حجاجه

وان كان راع الكرم دنياه صاليته
والناس ما تدري انه طافي سراجه

يصد عنهم وعذره بان توقيته
ماهو مناسب وبعض الناس هراجه

حيلة نزيه على الاسلام تربيْته
ما وده يشوف بعض الناس محتاجه

#عبدالله_الحديبي