[قسوة الأيام]

اظلمت في عيني الدنيا ولا ادري وين اروح
قل نوم وظلم قوم وكثر لوم ومضيعه

ما اشوف الا الغرابيل اختفى برقن يلوح
لو تهيا للسعاده درب اكيد ابي اتبعه

كل ما داويت جرح بجرح تظهر لي جروح
ادري ان اللي بكاسي سم اسمي واجرعه

ضاع عمري منصف لغيري لعذالي نصوح
سقم حال وضيق بال وسوء فال مجمعه

كني بسجن انفرادي مغلق بالفين لوح
لا امل عفون قريب ولا تفيد القرقعه

ما تهنيت بدلال ولا خبر عني شفوح
ولا شقيت بجمع مال الستر نفسي مطمعه

مثل عصفور"ن" يحسدونه على ريشن وروح
لا نبت ريشه يطير وسقم حاله يمنعه

وش تفيد لعيني الدمعه وقلبي لو ينوح
اشهد اني مع همومي ضعت وسط المعمعه

با الغثا وقتي كريم وباالهنا حظي شحوح
اصبحت حالي مثل معمي عيونه بصبعه

ما ظلمت ولا سلمت ولا خلط طبعي بجوح
دايمن بيبان قلبي للخلايق مشرعه

كان جنبي من تناجيني قبل تنوي نزوح
فارقت وامسيت هايم كل مرقاب اطلعه

لا هناة ولا غناة ولا مشاطرني مزوح
ما به الا نزف مجروحن وروح ملوعه

كنت اطرز للاماني ثوب وابني له صروح
ما تصورت القرير يجيه يومن يفجعه

كيف تصبح قمتي با الامس تحلم با السفوح
وكيف تصبح جنتي با الامس نار مولعه

اشحذ الفرحه من الاحزان قالت يا لحوح
فرحتك لو هي بيدي حبل ملزوم اقطعه

لا نوى وقتك يهينك ما تقدم لك شروح
من حكم مسبق عليك تظن قلبه يردعه

اشهد ان الموت راحه واشهد ان الصمت بوح
السكوت دواي اظنه في زمان الجعجعه