[عبدالله الحديبي]

غنى السهر لليل موال حصري
ورقص على جمر الهواجيس حافي

وكلما غفت عيني يقل وين ؟ بدري
قولوا له اني منهك وحيل طافي

وقولوا له ان اجمل من ابيات شعري
نومٍ بلا تفكير .. ولحاف دافي

لان الفكر يقطف من زهور عمري
ويدين حظي ساعدت في قطافي

ما بين ديّانة ومربوط شهري
وما بين قرض وبين دخلٍ اضافي

وتقويم ميلادي وتقويم هجري
وللحين غارق في ضرايب زفافي

واحلامي اللي حبها حب عذري
للحين ما حققتها الا قوافي

تجري بي الاحلام والوقت يجري
وباقي على تحقيقها وقت كافي

ويسوقني حظي على وين ؟ مدري
ماشي على درب الليال الخوافي

وان هزني وقتي تحداه صبري
وان ما تحقق ما بغيته ( عوافي )

اهم شي اعيش ما طاح قدري
واللي يهمشني وضعته خلافي

واهم شي اعيش ما ضاق صدري
لو تاكل سمان السنين : العجافِ

مادام ليل العسر يشرق ب يسرِ
باعيش في راحة ولي بال صافي

ومادام فضل الله فوقي وحدري
اقسم بربي ما تشاهد جفافي

يالله ياللي في يدك كل امري
تجعلني بين الناس طيب ووافي

وتجعل حياتي طيبة مثل ذكري
وتغفر لي اليا صارت ارضي لحافي

عبدالله الحديبي