رد: سـوالف عسـاف (2 ) الجـلد في مدارس زمـان
تذرت سالفة ايام كنت ثاني متوسوط
رسبت في ستة مواد شوفوا البلاده وما تسوي ههههه
اللي رسبت فيها هي رياضيات + علوم +قواعد +نصوص+حديث +انقليزي
وطبعا عدت دور ثاني وكان مسموح لي لاني وصلت ستة مواد لو انها سبعة مواد ما سمحوا ليه كان قالوا ليه انذلف كذا
المهم وقتها ادرس الكتاب كله يعني النصفين الاول والثاني ماهو زي زمنكم الحين مرتاحين
وأجيك وآذاكر جميع المواد اللي رسبت فيها واحفظ الاحاديث كلها مع الراوي
والعلوم حفظته غيب والهيموجلوبين وكيت وكيت مع الرسم
والرياضيات والانقليزي تعبت عليها تعب ماقد تعبت مثله وخاصة الانقليزي والقطع مدري وش يجيني من قطعه
والقواعد تعقدت منها لاني كنت اكره شي اسمه أعرب تحت خط
كنت احب في القواعد اذا جت كلمة (مسرورا ) لاني على طول اعرف الجواب واقول يساد يساد فعل مطلق هههه
والنصوص يا ويل حالي حفظت اشعار ونثر وخلوهااااااااااااااااااااا
بالله وش فايدة النصوص في مجال عملي ما استفدت منها ولا شي
واقلكم اني اختبرت
ويالله يالله لا يدرون اهلي اني رسبت في ستة مواد
كل ما نشدوني قلتلهم رسبت في اثنين ( كذابن هههههههههههه
وكل يوم اروح اختبر وينشدون وش معك كل يوم تروح المدرسه اقول ابغى اعرف النتيجه ( قلقان الاخ
والمهم يا اللي يقرون هون اختبرت في جميع اللي رسبت فيه وأخر مادة النصوص
اما هذي فباعلمكم بقصتي مع النصوص
ركزوا معي الله يخليكم
النصوص كان شغلي الشاغل لا احب الشعر ولا اواطن شي اسمه نثر والنصوص يعتمد على الحظ والحفظ وانا ما احب احفظ
لان راسي صغير من ايام ما ناطح براسي ذاك المدرس وما عاد ليه نفس احفظ اي شي هههههه
نرجع لمحور حديثنا
النصوص قطعت الاوراق اللي فيها شعر ونثر واحطها في جيبي آي نعم خبيتها في جيبي
وادخل الفصل
واستنى الورقة تجي عشان احل
مافي الا انا رسبت في النصوص من بد العالم
جاء بالورقة استاذ ماني قايل اسمه الله يسعده ويوفقه حيث ماهو دنيا وأخره
شوفوا وش سوى
اول ماشافني لحالي في الفصل قال غريبة من يرسب في النصوص
قلت خلها بظروفها يا استاذ وبغيت ابكي وحس اني بليد متيس وقال ماعليك
انت حل واذا خلصت جب الورقه
هوا قال كذا
وقال ليش ماجبت الكتاب معك
قلت هاه
قال النصوص
قلت معي الاوراق في جيبي
قال كويس ابداء حل
واخرج الاوراق والمستندات والصكوك وأدهر واحل بكل معاني الحب والاخلاص لهذا الوطن الغالي
واحل وانتهيت اعتقد جبت في النصوص 30 من 35 درجة مئويه هههههههه
طبعا كان الاستاذ اللي رسبت عنده مصري ورسبت في مادتين عنده
القواعد والنصوص
فجاء طبعا يهزاءني لاني رسبت في النصوص ويقول ليه يا ابني في حد يرسب في النصوص
انت ماتفهمش والا ايه ومش عارف ايه
والمعلم اللي خلاني احل والمراقب علي توسط لي عند المصري وقال الرجال عنده ظروف والله الله في النشمي هذا
يعني قصده ميديه
المصري هز راسه وقال خير خير
والنتيجة النهائيه
ماذا تتوقعون
لقد نجحت نعم نجحت في الدور الثاني
ستة مواد لست بمصدق بغيت اطير من الفرحه 0 مصدق ماني مصدق امهم اني نجحت وانتقلت الى ثالث متوسط
يا الله مااحلى طعم النجاح بعد تعب وجهد ومثابرة وصبر وكد وكان وقتها ارعى الغنم ومااروع الحياة
لقد انتعشت لي الحياة من جديد وضهر عدنان ولينا
0 وش دخل هذي بهذي
الفرحه وما تسوي هههههههههه
حتى ان الشباب اللي رسبوا في مادة او مادتين وما نجحوا راحوا يشتكون ليش هذا نجح في ستة وانحن ما نجحنا
ربك من فوق التوفيق بيده سبحانه
وهذي القصة صارت معي وارجوا اني ماتعديت حدودي بذكر افعال المعلم تجاهي ومساعدته لي ولا احرض على الغش ولكن كان زمن بالنسبة لصعوبة المعيشة والفقر يستدعي ان يكون هناك تعاون ومساعده يمشون ويدفون والله يوفق كل من ساعد الشباب
المفروض أن موسوعة جينس العالمية تدري عني وتسجلني في الموسوعه لاني رسبت في ستة مواد واختبرت دور ثاني ونجحت 0
والسلام
وين مكتبهم انا باروح لهم واقلهم يمكن يسجلوني ليش لا
لا تستغربون يمكن يجي يوم ويصير اسمي في الموسوعة ههههههه
ـــــــــــــــــــــــــــــــــــــ
|