تسوى وانا اخوك دنيا صاحبك تسوى
مادامه اول غرامك واخر احبابك
الصاحب اللي يضيق ويكثر الشكوى
اشوى من اللي يحط القفل في بابك
يا صاحبي ما خلقت وفي فمي حلوى
قد صابني شي لين اليوم ما صابك
احداث تروى وبعض احداث ما تروى
مرات تتباعد ومرات تتشابك
يوم(ن) من الحزن وايام(ن) من البلوى
تخيل الحزن ما يتلذذ إلا بك
والصاحب اللي عيونك منه ما تروى
تخيل إنه سكن في عين حرابك
وابوك وامك وخلانك وما تهوى
لو انهم كلهم يدعون بغيابك
ياصاحبي والشرود اللي به السلوى
تخيل إنه رفض يستاذن اهدابك
تخيل إنك كذا والوقت ما يطوى
إلا بحزن(ن)جديد وهم ينتابك
يا صاحبي ما خلقت وفي فمي حلوى
قد صابني شي لين اليوم ما صابك
خالد رجب