اليوم حاديني على الضيق حادي
عزي لمن حده زمانه على الضيق
يزهم ولكن ما يجيبه منادي
وباب الفرج دونه مقفل مغاليق
حتى غشى نور النهار السوادي
كنه بظلمة ليل ما به مشاريق
صابه من المضماه حرق الكبادي
كثر الضما يشكي منه يبسة الريق
والجو حار ولا يحوفه برادي
ما فيه قطرة ماء تبل المعاليق
عزاه ياحظ النكد وين غادي
وديتني يم القفار الحواريق
اشكيك للي مطلع في فؤادي
يبدل الحزن المخيم توافيق
ويحقق الله بعد حزني مرادي
رازق طيور الجو فوق الشواهيق
ارجيه سبحانه عليه اعتمادي
مالي رجا غيره ولا اقدر ولا اطيق
راشد الجمعان