[ألمحيط]

قلبي تعب واحتاج طب استشاري = نبضات قلبي غير ماهي سويه
واعلن علي الجسم حالة طواري = من قوة الرجاف والجاذبيه
من يوم شفت اللي بعينه حذاري = مثل الظبا اللي في الجبال العليه
والمشكله ماني قريب المحاري = اخاف لا ينقض جروحي عليه
وانا قضيت العمر حذرٍ مداري = لكنها صدفه وكانت قويه
منها غديت ارعى النجوم السواري = فكري غدى مشغول في كل نيه
ضليت مثل اللي سرى في الغداري = ويخاف من غدرة سهوم المنيه
ويسير عرضه للسباع الضواري = ودايم صويب الود ما فيه ديه


راشد الجمعان