صلوا على خير خلق الله = شفيعنا المصطفى الهادي
اللي انبعث للبشر منجاه = في وحدة الخالق ينادي
=
من دمع عيني كتبت حروف = و صورتها في معانيها
فيها من الوصف والموصوف = ما يلفت انظار قاريها
=
ياما قسمنا رغيف العيش = بالنص مابينك وبيني
واليوم تنسى وفانا ليش = وذيك العطايا من ايديني
=
بعض الخلايق تحطه تاج = وترفع مقامه وتقديره
ويجيب لك فالأخير إحراج = من ضعف عقله وتفكيره
=
وش ترتجي من ضليل العقل = إللى غوى والجهل ضله
غير الوشايه وكثر النقل = نفسه مريضه ومعتله
=
كلما بنينا وعلينا = نبغى جسور الوصال تمد
ما يحصل اللي تمنينا = ويظهر لنا في الموده ضد
=
خليك بالجانب الأرفع = وخل النظر للبعيد يمد
كثر المشاريه ما تنفع = ما غير تهدم جسور الود
=
مراكب الشوق ودتنا = وبحر الهوى سلوة العشاق
ولما على البر ردتنا = سرنا نعاني من الأشواق
=
اسمع صدى صوتي الساري = اللي مابين الضلوع يلج
من شوق قلبي ومن ناري = اللي عليه السنين تعج
=
كنت احسبه في محل الروح = ورفعت قدره وعليته
واصبحت من جانبه مجروح = وصار الذي ما تمنيته
ياكيف ذاك الوداد يروح = وينسى معه وقت قضيته
يوم الليالي عليه شحوح = صبيت له عذب وارويته
واعطيت له بالحياة طموح = ولا مد يده ورديته
رغم ان مالي معه مصلوح = غير اني اوفيه واوفيته
=
احنا سمعنا من الأخبار = مطلع خبر كلن يذيعه
مكشوف سره بدون ستار = وبانت علينا مواضيعه
يستاهل اللي لعب بالنار = لوكان تحرق اصابيعه
يعيش وسط اللهيب الحار = والكل يشريه ويبيعه
=
شفت الجبال الرواسي ذيك = طبعي ترى مثلها واكثر
ان كان عندك بها تشكيك = انابي الشك ما أثر
=
ايام الإنسان محسوبه = لو عاش ما عاش في دنياه
ايضا والأقدار مكتوبه = والعمر والمنتهى لله
=
ذكرتني ياغروب الشمس = باللي مضى لي من سنيني
تجددت ذكريات الأمس = وذكرتني محبيني
=
لي قلب ياهل الهوى مجروح = والطب في يدين جراحه
اللي سلب مهجتي والروح = وفي غيبته غيب افراحه
=
قلبي تفرق وجمعته = والتم شمله مع الغالين
وجرح الأسى فيه ودعته = عساه بعد المصافا يزين
=
حزين و ابكي على روحي = اللي ملاها الزمان جروح
حتى اشتكت لي من جروحي = وتأثيرها اللي بها مايروح
=
الشك والظن والريبه = من طبعها تتعب الإنسان
واللي تبلوا بها مصيبه = تجلب له الهم والأحزان
=
شوف الهنا والجمال الزين = وانظر معي روعة الصوره
و الواقع اللي يسر العين = كأنها ازهار منثوره
=
لولاك ماخط كفي حرف = ولا نزف حرفي الدامي
ولا غرفت المعاني غرف = وكتبت قصه من ايامي
=
أنا انصحك لا تسوى صقر = الحر يجرحك مخلابه
ويكثر عليك الطرد والنقر = وتنزف جروحك من اسبابه
يشقرك حد الجوارح شقر = ولا عاد تطلع لمرقابه
وتسير من تحت خط الفقر = في حال ما تحسب حسابه
=
خل الذي مايشوف يشوف = وخل الذي ما درى يدري
اليوم سرنا على المكشوف = مادام عندك رخص قدري
=
يعجبني الصاحب المضمون = اللي نواياه موثوقه
مبداه طول العمر ما يخون = ونفسه عزيزه ومصدوقه
=
لي دمع يوم اذرفه حراق = احرق جفوني ووجناتي
لجله تحدر من الأعماق = وترجم انيني واهاتي
=
راشد الجمعان ( المحيط )