المشاركة الأصلية كتبت بواسطة نسيم السروات
مرحبا أخي سعود الله يعطيك العافية مواضيعك بالمرررة رائعة وخاصة هذا الموضوع بالمرة راقي لي . تقبل فائق الشكر والتقدير . حواري سوف يكون بين إمرأتين ( كهلة وشابة ) الكهلة : سلام والعون يابنتي كيف حالك واحوالك ياغلة الشابة : هاي جدة كويسين والحمدلله الكهلة : وش تيه الفرة فيك تفلجين الملائكة قومي أمشطي كعشتك وأدهني غبرتك وحني ايديك الشابه : وعععععععع أنا أحني يديني مابقي إلا هي دوبي مسوية بودي كير ومناكير وحاطة مناكير تبيني أسوي حنا أووو ماي قاد لالالالا ياجدة لامستحيل . الكهلة : خري خرك الله وشنهو المنكر والنكير ذيه الله يسمعنا خير في ذا الليل . الشابة : بصوت منخفض / ياربيييييييييه وش ذا التخلف جدتي بتجنني . الكهلة : وش تقولين تحرتمين بينك وبين نفسك يالمغزولة الشابه : لالالا ياجدة ماقلت شئ بس ياليت تعفيني من طلباتك المتكررة تراي تعبت أسمع أوامر الكهلة : يابنتي ما تعجبني فرتك وكعشتك وملابسك شعرك كنك غسلتيه بدوى غسيل نصه أبيض ونصه أصفر ووجهك كأنك ذريتي فوقه بشوية طحين ومهادلك ( البراطم = الشفائف ) حمراء كأنك أكلتي كبده نيه والله أني مكعاك تسلمين عليه تلطخين زغوديه بذامعك الصباغ فوق براطمك يكوه عليك وعيونك عليه ذكر الله كما لا يكون أحد لكمك فوق عينك وصارت ملونه زرقا وحمراء وكل لون تخرع وإلا ملابسك وش ذا الملابس معك غبراء دبراء هطاميرن والله لو القاها بخمسة اريال ما خذها شرهه اللي قصير إلى مثناة ساقك والله شفاف يفشل رقعة الوجه الله يايمه يميتنا من حية المستور فضحتن الستر يابنات ذا الصفه الله لا يفضحنا الشابة : طيب ياجدة إحنا نعيش في زمان غير زمانكم وأحنا لنا طريفتنا في التجميل وأنتم لكم طريقه ياجده إحنا نضع المكيك أب على الوجه يزيده جمالا ورونقا ونرسم العيون بالكحل ونضللها بالضل وتصير عيون جميلة فاتنه ونجمل الشفاه بأحمر الشفائف ( الروج ) يعطيها لون رائع وجميل والشعر نصبغه بالألوان المختلفه من باب التغيير مو زيكم لون واحد ما تغيرونه حتى الشيب يغطي شعوركنه ولا تستطعنه التخلص منه مثلنا بالألوان . أما الملابس ياجدة فنحن نتبع الموضه ونواكب العصر أجل تبغينا نلبس مثل لبسكم على طول خلاص ياجدة الأول تحول لا عاد تفكرين فيه . الكهلة : يازين أيامنا يابنتي جمالنا من ربيه مانغيره نتكحل من كحل الحجر يزهي في العيون ونتعطر بالكادي والريحان والبعيثران ريحة الواحدة يوم تعدي من جنبك تدوخين من حسن ريحتها ، والحنا ماتقطع من أيدينا وأرجولنا حمرتها وريحتها تهني جوف كفاننا . وشعورنا مسرحة ومدهنة دخل شيالنا ماحد قد شافها ماهو كماكن الواحدة منكن مقرعة بكعشتها كما بقعا : Dقدام الناس باح الحيا . وثيابنا ساترة ونتستر من فوقها بالحوكه ونتعصب بذاك المنديل الأصفر من فوق روسنا يهول العقول الشابه : خلاص ياجدة لا تزعلين أنتم صح وإحنا بعد صح كل زمن ياجدة وله عاداته وتقاليده وفي زمانك ياجدة كنتي أحسن من زمن جدتك صح ياجدة وإلا لا؟؟ الكهلة : صح كان وقت جدتي فقر وجوع وأنحن يابنتي عشنا خير منهم . لكن والله والله لو تقهزين يابنتي ما تجينه كمانا ياذ الصفه ماغير روحي أمشطي كعشتك وغسلي وجهك .